 |
U niadzielu, 12 žniŭnia, Pieršy nacyjanalny kanał u pieradačy «Panarama tydnia» adznačyŭsia novym vykryvalnickim filmam — «Sieciŭnaja vajna». Aŭtar repartažu, Jury Prakopaŭ, raspaviadaje pra toje, što adrazu paśla pravału «mienskaha majdanu» ŭ 2006 hodzie «pad dacham Dziarždepartamentu ZŠA i specsłužbaŭ» pačali vypracoŭvać novyja metady baraćby ź biełaruskaj uładaj. Hety etap baraćby atrymaŭ nazvu «Sieciŭnaja vajna». Jana ŭžo apracoŭvałasia ŭ Iraku, Aŭhanistanie, Hruzii, Ukrainie, ciapier čarha za Biełaruśsiu.
U hetuju vajnu ŭklučanyja dziasiatki niedziaržaŭnych arhanizacyj, roznyja ruchi, fondy, pravaabaroncy, ŚMI, moładzievyja, žanočyja, relihijnyja, prafsajuznyja arhanizacyi. Usie razam jany ŭtvarajuć ahulnuju sietku, jakaja pakryvaje krainu. Za metu jany majuć «sacyjalnyja vybuchi z mnostvam ačahoŭ uzharańnia». Heta i musić pryvieści da revalucyjnaj sytuacyi ŭ Biełarusi.
Palityčny analityk Vadzim Hihin u repartažy kaža: «Na siońniašni dzień niama takich technalohijaŭ, jakija byli apracavanyja amerykancami ŭ inšych krainach śvietu, jakija b nie byli prymienienyja ŭ Biełarusi. Adzinaje, što nie było, dziakuj bohu, adkrytaha vajskovaha kanfliktu».
Prakopaŭ kaža, što sieciŭnaja vajna suprać Biełarusi viadziecca pry padtrymcy susiednich dziaržaŭ. U hety čas u kadrach pačynajuć źjaŭlacca ściah Polščy i hierb Litvy. «Dziasiatki fondaŭ układvajuć u sieciŭnuju vajnu miljony dalaraŭ», — reziumuje BT.
Adnak Biełaruś nia jość kančatkovaj metaj dla amerykancaŭ, ich pohlady nakiravanyja na Ŭschod, na Rasieju. Mienavita ŭ ramkach «sieciŭnaj vajny» ŭ Rasiei prajšli niadaŭnija «Maršy niazhodnych».
Razam z tym, BT nie nazvała metadaŭ supraćstajańnia «sieciŭnaj vajnie».
