Biełaruskija dypłamaty aktyvizavali kantakty ź jeŭrapiejskimi kalehami. 11 krasavika namieśnica ministra zamiežnych spraŭ Alena Kupčyna sustrakałasia ŭ Bruseli z členam Jeŭrapiejskaj kamisii pa pytańniach pašyreńnia ES i Jeŭrapiejskaj palityki susiedstva Štefanam Fiule, 15 krasavika jana sustrakałasia z pasłami Niamieččyny, Litvy i časovymi pavieranymi Čechii i Słavaččyny. I voś zapłanavany novy vizit u Jeŭropu.
17–18 krasavika 2013 u Bierlinie biełaruskaja delehacyja na čale z namieśnikam ministra zamiežnych spraŭ Alenaj Kupčynoj prymie ŭdzieł u mižnarodnaj kanfierencyi «East Forum Berlin 2013», paviedamlaje sajt biełaruskaha MZS.
Na forumie abmiarkujuć upłyŭ pazykovaha kryzisu ES na ekanomiki ŭschodnich krain-susiedziaŭ Jeŭrasajuza, pierśpiektyvy zon svabodnaha handlu, šancy i ryzyki, źviazanyja z mahčymym stvareńniem ahulnaj ekanamičnaj prastory ad Lisabona da Uładzivastoka.
U mierapryjemstvie prymuć udzieł členy ŭradaŭ krain Centralnaj i Uschodniaj Jeŭropy, palityčnaje kiraŭnictva Hiermanii, pradstaŭniki Jeŭrakamisii i top-menedžmient najbujniejšych hiermanskich kampanij i kancernaŭ.
Kiraŭnik biełaruskaj delehacyi prymie ŭdzieł u panelnaj dyskusii foruma na temu «Jeŭrapiejski sajuz, Uschodniaje partniorstva, Jeŭrazijski sajuz — vykliki i mahčymaści pahadnieńniaŭ ab svabodnym handli i ekanamičnaj harmanizacyi».
Biełaruskaja delehacyja zapłanavała taksama šerah sustreč u Fiederalnym ministerstvie zamiežnych spraŭ i Fiederalnym ministerstvie ekanomiki i technałohij FRH, Hiermanskim sajuzie handlova-pramysłovych pałat, z deputatami Bundestaha.
Kanfierencyja «East Forum Berlin 2013» arhanizavana Uschodnim kamitetam hiermanskaj ekanomiki pry padtrymcy banka «UniCredit HypoVereinsbank». Mierapryjemstva pravodzicca ŭpieršyniu i pazicyjanujecca ŭ jakaści dyskusijnaj placoŭki dla dyjałohu palitykaŭ i biznesmienaŭ z Zachadu i Ŭschodu ab pierśpiektyvach pahłybleńnia ŭzajemnavyhadnaha ekanamičnaha supracoŭnictva.
