Kamisija pa pytańniach pamiłavańnia pry prezidencie Ukrainy rekamiendavała Viktaru Janukoviču adchilić chadajnictva ab vyzvaleńni Julii Cimašenki. Pra heta ŭ subotu zajaviŭ namieśnik hienieralnaha prakurora Michaił Haŭryluk, jaki ŭvachodzić u kamisiju.
Pa słovach Haŭryluka, zhodna z zakanadaŭstvam padstaŭ dla pamiłavańnia niama.
Prašeńnie ab pamiłavańni byłoha premjera, jakaja adbyvaje siamihadovy termin za pieravyšeńnie paŭnamoctvaŭ pry padpisańni hazavaha pahadnieńnia z RF, było pieradadziena Janukoviču hrupaj žančyn ź liku apazicyjnych deputataŭ Viarchoŭnaj Rady 18 krasavika. Viadoma, što heta prašeńnie nie adzinaje, jakoje pastupiła prezidentu. Tak, z anałahičnymi prośbami raniej vystupali hramadskija aktyvisty z Zaparožža, Zakarpaćcia, Danieckaj i Lvoŭskaj abłaściej.
***
Julija Cimašenka była aryštavanaja paśla taho, jak da ŭłady va Ukrainie pryjšli jaje palityčnyja apanienty: Viktar Janukovič i jaho Partyja rehijonaŭ.Byłoha kiraŭnika ŭrada abvinavacili ŭ pieravyšeńni paŭnamoctvaŭ pry zaklučeńni hazavych pahadnieńniaŭ z Rasijaj. Sud pryznaŭ jaje vinavataj i prysudziŭ da siami hadoŭ turmy. U dačynieńni da eks-premjera byli raspačatyja jašče dźvie kryminalnyja spravy: joj staviacca ŭ vinu finansavyja machinacyi padčas kiraŭnictva «Adzinaj enierhietyčnaj sistemy Ukrainy», a taksama dačynieńnie da zabojstva deputata Jaŭhiena Ščerbania ŭ 1990-ja hady.
Sama Cimašenka usie abvinavačvańni ŭ svoj adras admaŭlaje, zajaŭlajučy, što ŭłady pieraśledujuć jaje pa palityčnych matyvach. Pry hetym eks-premjer nieadnarazova padkreślivała, što prasić prezidenta ab pamiłavańni (što aznačała b pryznańnie viny ź jaje boku) nie źbirajecca...
