21 traŭnia, nieviadomy patelefanavaŭ na mabilny telefon Źmiciera Jarmolenki, pradstaviŭsia supracoŭnikam KDB i prapanavaŭ sustrecca dziela taho, kab parazmaŭlać u niefarmalnaj abstanoŭcy.
Chłopiec ad sustrečy admoviŭsia, paviedamiŭšy, što jana adbudziecca tolki ŭ tym vypadku,kali jon atrymaje na ruki aficyjnuju pozvu.
Supracoŭnik KDB skazaŭ, što ŭ hetym niama takoj vostraj nieabchodnaści, i jon moža pryjechać da razmovy na pracu ŭ Harśviet, dzie pracuje Źmicier, adnak siońnia jon tak i nie źjaviŭsia.
Mahiloŭski błohier paviedamlaje, što dziaržaŭnyja struktury zacikavili jahonyja artykuły pra vałanciorku ź Niamieččyny, Marlenu Chielš, jakaja ad vieraśnia minułaha hoda da siaredziny traŭnia hetaha hoda pracavała ŭ Mahiloŭskim fondzie “Błakitnyja bierahi” ź dziećmi daškolnaha ŭzrostu i ludźmi z abmiežavańniami.
Sama Marlena ŭžo pakinuła Biełaruś, adnak intares da jaje asoby i publikacyj na mahiloŭskim sajcie «Svabodny farmat» u rubrycy «Dziońnik vałanciora» tolki ŭzros.
Varta adznačyć, što supracoŭniki KDB taksama telefanavali ŭ Mahiloŭski fond «Błakitnyja bierahi» i pytalisia ŭ jaje kiraŭnički Śviatłany Pahirskaj, ci viedaje jana pra toje, što vałanciorka ź Niamieččyny drukuje svaje natatki na sajcie «Svabodny farmat».
U toj samy dzień supracoŭniki dziaržbiaśpieki paturbavali siabroŭ Svabodnaha prafsajuzu mietalistaŭ. Pra heta paviedamlaje miascovy prafsajuzny lidar Halina Lisicyna. U pryvatnaści, 21 traŭnia da jaje zavitali supracoŭniki KDB, ź jakimi jana admoviłasia razmaŭlać biez pozvy.
Dniami raniej Halinie Lisicynaj daviałosia parazmaŭlać z supracoŭnikami dziaržbiaśpieki kala dvuch hadzin. Pytańni datyčylisia dziejnaści prafsajuza, pajezdkam aktyvistaŭ u inšyja miescy, a taksama vierahodnym pierajemnikam Haliny Lisicynaj na pasadzie prafsajuznaha kaardynatara ŭ Mahilovie.
Žančyna adznačaje, što ŭ jaje skłałasia ŭražańnie, što KDB pra jaje viedaje bolej, čym jana sama. Praź ich aktyŭnaść u jaje źjavilisia prablemy ŭ siamji.
Akramia taho, Halina Lisicyna kaža, što supracoŭniki KDB prychodzili na pracu jašče da adnoj aktyvistki prafsajuza, proźvišča jakoj jana nie pažadała ahučvać.
