Alaksandr Łukašenka 30 maja padpisaŭ ukaz № 246, jakim rehłamientujecca akazańnie dziaržaŭnaj padtrymki na budaŭnictva žylla.Dakumient unosić źmianieńni i dapaŭnieńni ŭ niekatoryja raniej pryniatyja ŭkazy, paviedamlaje pres-słužba prezidenta.
Tak, ukazam ustanoŭleny pryncyp adnarazovaści akazańnia dziaržaŭnaj padtrymki (ilhotnaha kredytu i (ci) adnarazovaj subsidyi) dla hramadzian i členaŭ ich siemjaŭ, jakija palapšajuć sumiesna ź imi žyllovyja ŭmovy, za vyklučeńniem šmatdzietnych siemjaŭ, u jakich padstavy dla paŭtornaj pastanoŭki na ŭlik dla palapšeńnia žyllovych umoŭ uźnikli ŭ suviazi z naradžeńniem, udačareńniem, usynaŭleńniem dziaciej.
Vyklučajecca mahčymaść davańnia adnarazovych subsidyj na pahašeńnie zavinavačanaści pa lhotnych kredytach, vydadzienych maładym siemjam i hramadzianam, jakija pastajanna pražyvajuć i pracujuć u sielskich nasielenych punktach.
Ilhoty, dadzienyja ŭkazam ad 6 studzienia 2012 hoda № 13 dla hramadzian, jakija pastajanna pražyvajuć i pracujuć u nasielenych punktach z kolkaściu nasielnictva da 20 tys. čałaviek, buduć raspaŭsiudžany na hramadzian, jakija budujuć žyłyja pamiaškańni ŭ haradach-spadarožnikach, niezaležna ad kolkaści nasielnictva ŭ ich. Jak adznačajecca ŭ paviedamleńni pres-słužby, heta dazvolić stvaryć umovy dla pryciahnieńnia hramadzian z abłasnych centraŭ i Minska ŭ harady-spadarožniki, kolkaść nasielnictva jakich moža pieravyšać 20 tys. čałaviek (naprykład u Dziaržynsku kolkaść nasielnictva ŭžo składaje 25,7 tys.).
Paŭnaletnim maładym hramadzianam, jakija źjaŭlajucca łaŭreatami śpiecyjalnaha fondu prezidenta Biełarusi pa sacyjalnaj padtrymcy adoranych navučencaŭ i studentaŭ ci śpiecyjalnaha fondu prezidenta pa padtrymcy talenavitaj moładzi, viartajecca prava na pazačarhovaje atrymańnie lhotnych kredytaŭ na budaŭnictva (rekanstrukcyju) abo nabyćcio žyłych pamiaškańniaŭ.
Ilhotnyja kredyty i adnarazovyja subsidyi na budaŭnictva (rekanstrukcyju) žyłych pamiaškańniaŭ buduć vydzialacca hramadzianam tolki ŭ ekanamičnych žyłych damach typavych spažyvieckich jakaściaŭ,pieralik jakich zaćviardžaje Minbudarchitektury. Heta dazvolić pavialičyć budaŭnictva žylla za košt ilhotnych kredytaŭ i adnarazovych subsidyj, adznačaje pres-słužba.
Raźlik maksimalnaha pamieru lhotnaha kredytu budzie ažyćciaŭlacca z ulikam narmatyvaŭ ahulnaj płoščy žyłoha pamiaškańnia, što budujecca, i koštu kvadratnaha mietra ahulnaj płoščy, jaki nie pieravyšaje adziny miežavy narmatyŭ koštu adnaho kvadratnaha mietra ahulnaj płoščy žyłoha pamiaškańnia, vyznačany Savietam ministraŭ.
Dla hramadzian, jakija žyvuć u nieprydatnych dla pražyvańnia adnakvaternych (błočnych) žyłych damach i žadajuć pabudavać novy dom na hetym ža ziamielnym učastku, budzie ažyćciaŭlacca raźlik ilhotna kredytavanaj płoščy biez uliku ahulnaj płoščy žyłoha pamiaškańnia, pryznanaha nieprydatnym dla pražyvańnia.
Dla hramadzian, jakija ažyćciaŭlajuć budaŭnictva (rekanstrukcyju) adnakvaternych, błočnych žyłych damoŭ i z-za ŭvažlivych pryčyn va ŭstanoŭleny ŭkazam № 13 trochhadovy termin nie vykarystali ŭ poŭnym abjomie praduhledžanyja dla hetych met kredytnyja resursy, dajecca prava AAT "AAB "Biełarusbank" pavodle ŭzhadnieńnia z adpaviednymi miascovymi vykanaŭčymi i rasparadčymi orhanami praciahvać nie bolš jak na dva hady termin vydačy lhotnych kredytaŭ.
Zaklučeńnie kredytnych dahavoraŭ ažyćciaŭlajecca pry ŭmovie ŭniasieńnia hramadzianami, jakija ažyćciaŭlajuć budaŭnictva (rekanstrukcyju) adnakvaternych, błočnych žyłych damoŭ i ŭklučany ŭ śpisy na atrymańnie lhotnych kredytaŭ, ułasnych srodkaŭ na budaŭnictva (rekanstrukcyju) hetych žyłych damoŭ u pamiery nie mienš za 15% ad sumy,vyznačanaj jak roznaść pamiž koštam budaŭnictva (rekanstrukcyi) žyłoha pamiaškańnia i maksimalnym pamieram nieabchodnaha lhotnaha kredytu. Raźlik pamieru ŭłasnych srodkaŭ, uniesienych na budaŭnictva (rekanstrukcyju) žyłoha pamiaškańnia, ažyćciaŭlajecca zychodziačy z koštu vykananych rabot i (ci) zakuplenych materyjałaŭ i vyrabaŭ.
Z adnaho da piaci hadoŭ pavialičvajecca zabarona na adčužeńnie žyłych pamiaškańniaŭ, pabudavanych z pryciahnieńniem ilhotnych kredytaŭ, u vypadkach daterminovaha pahašeńnia kredytu.
Ustanaŭlivajecca taksama zabarona na davańnie hramadzianami ŭnajmy žyłych pamiaškańniaŭ pryvatnaha žyllovaha fondu, pabudavanych z pryciahnieńniem ilhotnaha kredytu, da poŭnaha jaho pahašeńnia, za vyklučeńniem vypadkaŭ, kali heta dazvolena adpaviednymi miascovymi vykanaŭčymi i rasparadčymi orhanami.
Miascovyja vykanaŭčyja i rasparadčyja orhany sumiesna z MUS abaviazany zabiaśpiečvać sistematyčny kantrol za vykanańniem ustanoŭlenaha paradku davańnia ŭnajmy žyłych pamiaškańniaŭ, pabudavanych z pryciahnieńniem ilhotnaha kredytu.U vypadku parušeńniaŭ ustanoŭlenaha paradku ŭkazam praduhledžvajecca administracyjnaja adkaznaść dla hramadzian (štraf ad čatyroch da tryccaci bazavych vieličyń) i vyznačany ŭpaŭnavažanyja słužbovyja asoby dziaržaŭnych orhanaŭ, jakija majuć prava na składańnie pratakołaŭ ab takim administracyjnym pravaparušeńni.
Ukaz nabyvaje moc 1 červienia 2013 hoda.
