Tureckaja palicyja ŭ Stambule vyzvaliła płošču Taksim, płany zabudovy jakoj pryviali da masavych pratestaŭ.Paśla taho, jak z płoščy byli prybrany barykady, jaje zapoŭnili niekalki tysiač pratestoŭcaŭ.
Premjer-ministr Turcyi Redžep Taip Erdahan publična pryznaŭ, što palicyja dapuściła pamyłki padčas procidziejańnia pratestoŭcam i nieabhruntavana ŭžyła siłu. U ministerstvie ŭnutranych spraŭ Turcyi zajavili, što da palicejskich, čyje dziejańni byli praźmiernyja, buduć užytyja miery.
Demanstranty pratestujuć suprać zabudovy płoščy Taksim i prylehłaha da jaje parku Hiezi i vysiečki ŭ im dreŭ. Masavyja pratesty pačalisia ŭ piatnicu, 31 maja, i nieŭzabavie pieraraśli ŭ sutyknieńni z palicyjaj. Pa roznych dadzienych, paciarpieli bolš za 60 čałaviek, palicejskija byli vymušany ŭžyć śpiecsrodki dla razhonu.
U parku Hiezi płanujecca pabudavać handlovy centr, a taksama adnavić budynak kazarmaŭ časoŭ Asmanskaj impieryi. Erdahan, kamientujučy masavyja pratesty, zajaviŭ, što prajekt rekanstrukcyi parku i adnaŭleńnia kazarmaŭ admienieny nie budzie, adnak adznačyŭ, što los handlovaha centra ŭ parku pakul niajasny.
Akcyi salidarnaści z pratestoŭcami ŭ Stambule adbylisia ŭ šerahu inšych haradoŭ Turcyi, u tym liku ŭ Ankary, dzie demanstranty zaniali adnu z centralnych płoščaŭ.