Aficyjnaja pradstaŭnica Śledčaha kamiteta Biełarusi Julija Hančarova paviedamiła Interfaksu, što jaje viedamstva pačało rasśledavańnie kryminalnaj spravy ŭ dačynieńni da byłoha dyrektara — mastackaha kiraŭnika Biełdziaržcyrku:
«Kryminalnaja sprava ŭ dačynieńni da byłoha dyrektara raspačataja Hienieralnaj prakuraturaj pa materyjałach Hałoŭnaha ŭpraŭleńnia pa baraćbie z ekanamičnymi złačynstvami MUS i Kamiteta dziaržaŭnaha kantrolu.
Pavodle atrymanych materyjałaŭ kryminalnaj spravy, były kiraŭnik ustanovy padazrajecca ŭ złoŭžyvańni słužbovymi paŭnamoctvami (č. 3 art.424 Kryminalnaha kodeksu). Śledčy kamitet pryniaŭ kryminalnuju spravu da vytvorčaści i prystupiŭ da rasśledavańnia».
Aficyjnaja pradstaŭnica SK nie nazvała proźvišča asoby, suprać jakoj zaviedzienaja sprava, ale skazała pra jaje ŭ žanočym rodzie: «Miera strymańnia da padazravanaj nie ŭžyvałasia».
U historyi cyrku była tolki adna žančyna-dyrektar — Taćciana Bandarčuk, astatnija — mužčyny.
Taćciana Bandarčuk kiravała cyrkam z 1996 hoda, aficyjnaje paviedamleńnie pra jaje zvalnieńnie nie publikavałasia. Na sajcie Biełdziaržcyrka jana dahetul paznačanaja jak dyrektar i mastacki kiraŭnik.
Taćciana Bandarčuk — zasłužany dziejač mastactvaŭ Respubliki Biełaruś, akademik Nacyjanalnaj akademii cyrkavoha mastactva Rasii, narodnaja artystka Biełarusi. Bandarčuk kiravała niadaŭniaj maštabnaj rekanstrukcyjaj cyrku.
Pavodle inkryminavanaha artykuła joj pahražaje da 10 hadoŭ pazbaŭleńnia voli z kanfiskacyjaj majomaści.