U Biełarusi pa-raniejšamu nie vychodziać niezaležnyja hramadzka-palityčnyja vydańni – «BDH. Diełovaja hazieta» j «Narodnaja vola». Žurnalisty tydniovika «Naša Niva» pracujuć nad čarhovym numaram. Redakcyja hazety Partyi kamunistaŭ biełaruskaj «Tovariŝ» raspaŭsiudžvaje specvypusk. Jakimi bačać paślavybarčyja perspektyvy svaich vydańniaŭ redaktary niezaležnych hazet?
Hałoŭny redaktar «Narodnaj voli» Iosif Siaredzič aryjentuje, kali možna čakać śviežy numar niezaležnaje hazety.
(Siaredzič: ) «Što majem namier adnavić vychad hazety ŭ samyja bližejšyja dni, – heta fakt. Ale ž pad heta musim atrymać ćviordyja harantyi. Kali my budziem drukavacca ŭ Smalensku, a hazetu iznoŭ zatrymajuć na miažy, to niama nijakaha sensu vydatkoŭvać srodki. U Miensku apošniaja razmova była z dyrektaram drukarni «Čyrvonaja zorka» j ja telefanavaŭ ministru infarmacyi. Treba ž pačuć: ci tak, ci nie? My nia možam pakul pryniać rašeńnia, nie atrymaŭšy adkazu tut, u nas».
Redaktar «BDH. Diełovaja hazieta» Piotar Marcaŭ nia vieryć, što ciapier možna adnavić vydańnie niezaležnaj hazety ŭ miežach Biełarusi.
(Marcaŭ: ) «Ministar nie vyrašaje hetych spraŭ. Jon čakaje niejkich rasparadžeńniaŭ z administracyi. A administracyja... Nakolki ja razumieju, tolki adna asoba prymaje pa hetaj temie rašeńni... U Biełarusi ciapier adnaznačna nijakaj mahčymaści drukavacca niama. I ja nia vielmi razumieju, čamu jana pavinna była źjavicca. Nie mahu ničoha dadać novaha. Sytuacyja absalutna nie źmianiłasia».
Piotar Marcaŭ paviedamiŭ, što redakcyja nie atrymała raniej zatrymanaha nakładu hazety. Taksama na biełaruska-rasiejskaj miažy zastajecca j pieradvybarčy numar «Narodnaj voli». Pad aryštam ŭ Miensku – nakład apošniaha numaru hazety «Tovariŝ», jakuju redahuje Siarhiej Vaźniak.
(Vaźniak: ) «9-y numar (nakład – 200 tysiač), jaki kanfiskavali, siońnia sprabujuć viarnuć. Ale ja zajaviŭ: «Kali vy, chłopcy, zabrali, to sami pryviaziecie. Jany, biednyja, nia viedajuć, što rabić. Bo tam ažno 4 tony».
Sa słoŭ Siarhieja Vaźniaka, pa hrafiku vyjšaŭ 10-y numar hazety. 100-tysiačny jahony nakład nadrukavany ŭ Maskvie. Rychtujecca nastupny.
Tydniovik «Naša niva» za adsutnaściu asudžanaha na 15 sutak hałoŭnaha redaktara Andreja Dyńki padpisvaje da druku pieršy namieśnik Andrej Skurko.
(Skurko: ) «Hałoŭnyja temy bližejšaha numaru – Dzień Voli. Šmat staronak pryśviecim hetamu. Taksama naš žurnalist cikaviŭsia Zvonam Svabody, daśledavaŭ, dzie jon ciapier znachodzicca. Budzie j padborka revalucyjnaj paezii pavodle padziejaŭ 25-ha sakavika».
Andrej Skurko adznačyŭ, što padpiska j alternatyŭnaja dastaŭka «Našaj nivy» ŭ sakaviku majuć «padraści», i nakład tydniovika, mahčyma, pieravysić try tysiačy asobnikaŭ.
