Muziej zajmaje druhi pavierch siadziby Biełaruskaha relihijnaha i kulturnaha centra imia śviatoha Kiryły Turaŭskaha.
Ajciec Alaksandr Nadsan - niaźmienny zachavalnik muzieja.
Unikalnyja słuckija pajasy, kuplenyja na «błyšynym rynku».
Pačak machorki časoŭ Druhoj suśvietnaj.
Ekspanaty ź pieršych hadoŭ niezaležnaści.
Srebnaja hryŭnia: biełaruskaja valuta ŭ XV st.
Rarytetnaja paštoŭka z kalekcyi.
Paštovyja marki BNR.
«Kurhan» Janki Kupały. Aŭtohraf z aŭtarskimi praŭkami.
Mapa BNR.
Ajciec Alaksandr Nadsan prymaje ŭ muziei kožnaha biełarusa.
Śviežaja "Naša Niva" na jahonym stale.
Hety muziej mieścicca ŭ adnym z damoŭ siadziby Biełaruskaha relihijnaha i kulturnaha centra imia śviatoha Kiryły Turaŭskaha. Muziej zajmaje druhi pavierch. U tym samym domie z rypučymi leśvicami na pieršym paviersie źmiaščajecca biblijateka imia Franciška Skaryny. Tamsama žyvie i apostalski vizitatar dla biełarusaŭ zamiežža, ajciec Alaksandr Nadsan.
Vyznačyć, dzie skančajecca biblijateka i pačynajecca muziej, dosyć ciažka: knihi paŭsiul. Zrabić heta dapamahajuć chiba dychtoŭnyja, pa ŭsich praviłach aformlenyja muziejnyja stełažy z ekspanatami.
Heta muziej dla svaich. Siudy nie pradajuć kvitkoŭ, u turystyčnych biuro niama jaho rekłamak. Chutčej, heta kalekcyja, vystaŭlenaja z prezientacyjnymi metami: pabačyŭšy jaje, kožny zrazumieje, što za kraj — Biełaruś. Asabliva kali ekskursavodam — sam ajciec Nadsan.
Ahlad nievialikaha pa płoščy muzieja zajmaje hadzinu. Za kožnym ekspanatam — historyja. Unikalnyja słuckija pajasy, jakich u muziejach Biełarusi niama, raskazvaje Nadsan, jamu paščaściła kupić... na «błyšynym rynku», u jakohaści habreja. Padobnym čynam pryvandravała ŭ muziej i Skarynava Biblija.
Bolšaść ekspanataŭ muzieja pryśviečana XX stahodździu: mapa Biełaruskaj Narodnaj Respubliki, artefakty vajennych časoŭ, znački, šaŭrony, hrošy niezaležnaj Respubliki Biełaruś — ad pradmietaŭ, jakija jość mała nie ŭ kožnym biełaruskim domie da nacyjanalnych śviatyniaŭ. Takich, jak aŭtohraf «Kurhana» Kupały ci turemnaja roba Łarysy Hienijuš.
Muziej pačynaŭ źbiracca jašče tady, kali niepachisna stajaŭ mur miž Zachadam i Uschodam i Biełaruś zdavałasia nazaŭsiody źniavolenaj u savieckaj impieryi. Biełaruskija arhanizacyi za miažoj zasnoŭvali ludzi, jakija nie spadziavalisia kaliści viarnucca, pabačyć rodnych, što zastalisia tam, za kalučym drotam.
Zavitajcie ŭ muziej, jak budziecie ŭ Łondanie. Natchniciesia enierhijaj, žyćcialubstvam, vieraj ajca Nadsana.
Biełaruski kulturna-relihijny centr
znachodzicca ŭ rajonie Finchley (Finčli) u paŭnočnym Łondanie, na skryžavańni Holden Avenue i Holden Road. Najpraściej dabracca mietro: paŭnočnaj linijaj da stancyi Woodside Park.
Na aŭto: z Paŭnočnaj kalcavoj šašy (North Circular) źviarnuć na A1000, a potym uleva da Tally Ho Corner.
Aŭtobusam: 82-m z aŭtobusnych stancyjaŭ Victoria abo Golders Green; 134-m z Oxford Street — abodvuma aŭtobusami da Tally Ho Corner; 221-m z Mill Hill Broadway i 326-m z Brent Cross — da prypynku Sussex Ring.