Dziaržynski rajonny sud (Minskaja vobłaść) apraŭdaŭ źbitaha milicyjanierami Siarhieja Chačaturana i spyniŭ u dačynieńni da jaho spravu pa č. 1 art. 17.3 Kodeksa ab administracyjnych pravaparušeńniach (źjaŭleńnie ŭ niećviarozym vyhladzie ŭ hramadskim miescy). Takoje rašeńnie sud pryniaŭ jašče 20 červienia, paviedamlaje pravaabarončy sajt platformarb.com.
Jak raniej paviedamlała UUS Minabłvykankama, u noč z 17 na 18 sakavika ŭ Dziaržynsku niedaloka ad restarana narad PPSM zatrymaŭ dvuch miascovych žycharoŭ, jakija nibyta byli mocna pjanyja, pavodzili siabie aburalna, a pry zatrymańni akazali supraciŭleńnie i navat nanieśli milicyjanieram cialesnyja paškodžańni.Adnak paźniej na sajcie platformarb.com źjaviłasia historyja zatrymanych Chačaturana i Hančara, jakaja ŭ mnohim razychodziłasia ź viersijaj milicyi. Jany raskazali, što supracoŭniki PPSM vystavili pretenzii nieabhruntavana, admaŭlali ŭ mahčymaści pazvanić, a potym, pry zatrymańni, pavodle słoŭ vypadkovych śviedak, źbivali rukami, nahami, dubinkami ŭžo zakavanych u naručniki maładych ludziej. Śviedki śćviardžali, što pry hetym milicyjaniery pavodzili siabie ahresiŭna, brydka łajalisia. Chačaturan skazaŭ, što supracoŭniki milicyi źnievažali jaho i praciahvali źbivać i ŭ RAUS.
Administracyjnaja vytvorčaść pa č. 1 art. 17.3 KoAP u dačynieńni da Chačaturana była raspačata 18 sakavika. Pastanovaj načalnika Dziaržynskaha RAUS Śviatasłava Daraševiča 19 sakavika małady čałaviek byŭ aštrafavany na 4 bazavyja vieličyni (400 tys. rubloŭ).Chačaturan abskardziŭ heta rašeńnie, i 12 krasavika sudździa Dziaržynskaha rajonnaha suda Iryna Bakunovič admianiła pastanovu Daraševiča i adpraviła spravu na novy razhlad.
6 maja načalnik Dziaržynskaha RAUS znoŭ pastanaviŭ spahnać z Chačaturana štraf pa anałahičnym artykule. Sudździa Bakunovič na sudovym pasiadžeńni 20 červienia pryniała rašeńnie spynić spravu i kančatkova admianiła pastanovu Daraševiča.
Jak zaznačaje pravaabarončy sajt, sudździa zasumniavałasia ŭ praŭdzivaści rapartaŭ milicyjanieraŭ Kaścieviča i Klimašeŭskaha, jakija pravodzili zatrymańnie, a paśla vystupali śviedkami ŭ sudzie.Na padstavie pakazanych videamateryjałaŭ kamiery nazirańnia jana zrabiła vysnovu, što Chačaturan «pavodziŭ siabie spakojna i adekvatna, razmaŭlaŭ ź siabrami, z boku ŭ bok nie chistaŭsia, byŭ apranuty čysta», a jaho pavodziny «nie źnievažali čałaviečuju hodnaść i maralnaść», nasupierak śviedčańniam milicyjanieraŭ.
Prymajučy rašeńnie, Bakunovič źviarnuła ŭvahu na toje, što raparty Kaścieviča i Klimašeŭskaha «identyčnyja i śviedčać pra toje, što jany byli napisanyja imi abo pad dyktoŭku, abo pad kapirku, abo śpisany adzin u adnaho».
Aprača taho, u mai sudździa Minskaha abłasnoha suda Anatol Dabradziej spyniŭ spravu ŭ dačynieńni da Chačaturana pa art. 17.1 KoAP (drobnaje chulihanstva).
Na siońnia ŭ dačynieńni da maładoha čałavieka raspačata jašče i kryminalnaja sprava pa č. 2 art. 363 Kryminalnaha kodeksa (supraciŭleńnie supracoŭniku orhanaŭ unutranych spraŭ ci inšaj asobie, jakaja achoŭvaje hramadski paradak, źviazanaje z prymianieńniem nasilla ci z pahrozaj jaho prymianieńnia).
Adnak pravaabaroncy zaznačajuć, što ŭ śviatle spynieńnia administracyjnych spraŭ u dačynieńni da Chačaturana pa kryminalnaj spravie jon taksama, chutčej za ŭsio, budzie apraŭdany.
