Rasijskija žurnalisty zrabili zaŭvahu ministru kultury Biełarusi za pramovu pa-biełarusku 74

Ministr kultury Barys Śviatłoŭ. Fota Ihara Maćviejeva, Tut.by.

Na pres-kanfierencyi, jakaja prajšła 11 lipienia ŭ Viciebskim abłvykankamie i pryśviačałasia adkryćciu XXII Mižnarodnaha fiestyvalu mastactvaŭ «Słavianski bazar u Viciebsku», ministr kultury Biełarusi Barys Śviatłoŭ źviarnuŭsia da žurnalistaŭ pa-biełarusku.

Heta nie spadabałasia pradstaŭnikam zamiežnych ŚMI, akredytavanych na forumie, paviedamlaje Tut.by.

Paśla ŭstupnaha słova ministra ŭ pieršych šerahach zała, dzie ŭ asnoŭnym siadzieli supracoŭniki rasijskich ŚMI, pačulisia niezadavolenyja hałasy: «A zaraz pierakładzicie nam toje, što vy skazali!». Adna z žančyn pramoviła litaralna nastupnaje: «My zdieś nie lišnije, vo-piervych!».

Na situacyju taktoŭna paŭździejničaŭ viadučy pres-kanfierencyi, viadomy rasijski artyst Siarhiej Šuścicki. «Mnie kažietsia, čto vsie ckazannoje i tak poniatno i nie triebujet pierievoda», — źviarnuŭsia jon da niezadavolenych ministravaj movaj. Incydent zhładziŭ sam Barys Śviatłoŭ, jaki pierajšoŭ na ruskuju i paabiacaŭ adkazać na lubyja pytańni — na toj movie, na jakoj jany prahučać. Dalejšyja pytańni ministru kultury zadavali pa-rusku, hetak ža jon na ich i adkazvaŭ.

Na žal, pryncypova novaj infarmacyi za hadzinu pres-kanfierencyi tak i nie prahučała. Śpikiery ŭ čarhovy raz ahučyli toje, što paviedamlali na raniejšych sustrečach z žurnalistami, abo toje, što možna pračytać u fiestyvalnych pres-relizach ci bukletach.

Barys Śviatłoŭ zaznačyŭ, što «Słavianski bazar u Viciebsku» staŭ «suśvietnym brendam, jaki pryciahvaje tysiačy artystaŭ, prychilnikaŭ, turystaŭ z roznych krain, pradstaŭnikoŭ ŚMI, usich, chto cikavicca muzyčnaj kulturaj». Pa słovach ministra kultury, sioletni fiestyval, niahledziačy na toje, što skaraciŭsia na dva dni, pazicyjanujecca jak «fiestyval fiestyvalaŭ».

Namieśnik staršyni Viciebskaha abłvykankama Uładzimir Ciarenćjeŭ paviedamiŭ, što da fiestyvalu surjozna rychtavalisia ŭsie słužby i haradskaja infrastruktura. Ramantavalisia hateli — u hetym vielmi dapamoh hazpramaŭski karparatyŭny fiestyval «Fakieł», jaki prajšoŭ u mai: tolki na dobraŭparadkavańnie adnoj haścinicy «Dźvina» rasijanie vydatkavali 1350 miljardaŭ rubloŭ. Kucharaŭ i pavaroŭ, jakija buduć hatavać dla zorak «Słavianskaha bazara», navat adpraŭlali na vučebnyja kursy. Staralisia łandšaftnyja dyzajniery, transpartniki, rabotniki handlu. Hatova da fiestyvalu i milicyja. «Spadziajusia, što jana budzie pracavać pryhoža, intylihientna, z pavahaj da ŭsich», — adznačyŭ U.Ciarenćjeŭ.

Dyrektar dyrekcyi fiestyvalu Alaksandr Sidarenka pačaŭ z taho, što padziakavaŭ za prafiesijnuju pracu ŭsiamu kalektyvu Centra kultury «Viciebsk» i byłomu kiraŭniku «Słavianskaha bazaru» Radzivonu Basu. Žurnalisty zaapładziravali, tym samym taksama vykazvajučy svaju ŭdziačnaść i simpatyju Radzivonu Michajłaviču.

Pa słovach Sidarenki, vyručka ad realizacyi biletaŭ na fiestyvalnyja kancerty skłała 20 miljardaŭ rubloŭ. «Heta značny składnik dachodnaj častki fiestyvalu», — paviedamiŭ jon.

Što tyčycca raschodaŭ, to ich ahučyŭ Barys Śviatłoŭ. Jon padkreśliŭ, što viciebski fiestyval pa-raniejšamu maje «mahutnuju dziaržaŭnuju padtrymku». Sioleta heta 8 miljardaŭ 387 miljonaŭ rubloŭ. Aproč taho, fiestyval atrymaŭ 24 896 miljony rasijskich rubloŭ ź biudžetu Sajuznaj dziaržavy.

Nahadajem, sioletni «Słavianski bazar u Viciebsku» projdzie z 11 pa 15 lipienia. Udzieł u im voźmuć artysty z 31 krainy śvietu. Na jaho akredytavanyja kala 5 tysiač čałaviek. Fiestyvalny bedž atrymali bolš za 500 pradstaŭnikoŭ ŚMI z 14 krain. Na 13 tvorčych placoŭkach projdzie bolš za 60 kancertaŭ, śpiektaklaŭ, kinapakazaŭ, vystaŭ, prezientacyj.

Taćciana Maćviejeva, Tut.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH