Pamior mastak z Maładziečna Kastuś Charaševič.
Pra heta ŭ svaim fejsbuku paviedamiŭ litaraturaznaŭca Cichan Čarniakievič.
Kastusiu Charaševiču 6 lipienia spoŭniłasia 86 hadoŭ (naradziŭsia ŭ 1927 h. u v. Litva Maładziečanskaha rajona). Jon byŭ vučniem piedahoha Barysa Kita, vučyŭsia ŭ Maładziečanskaj handlovaj škole.
Tvorčaść
Pa ŭspaminach Charaševiča, da mastactva jon pryjšoŭ užo sfarmavanaj asobaj. Pieršuju sapraŭdnuju karcinu jon ubačyŭ u 20 hadoŭ: jaho heta ŭzrušyła. Tady pačaŭ kapiravać čužyja pałotny. U 27 tolki pastupiŭ u mastackaje vučylišča. A da hetaha jaho bolš cikaviła litaratura.
«Nie viedajučy ab žyvapisie, ja sprabavaŭ siabie ŭ paezii. Byli maje vieršy, kaniečnie ž, pa-junacku naiŭnyja, ale ich raźmiaščali ŭ školnaj naściennaj haziecie. Źbiraŭsia ja stać prazaikam, kab uziacca za temy pa historyi Biełarusi. Historyju ja lubiŭ i viedaŭ niadrenna, navat i ciapier niešta pamiataju. Asabliva mianie ŭschvalavali temy paŭstańniaŭ, a siarod paŭstancaŭ — asoba Kastusia Kalinoŭskaha. Źbiraŭsia pryśviacić jamu paemu ci prazaičny tvor»,
— kazaŭ Kastuś Charaševič u adnym z intervju. Ale jahonaja litaraturnaja spadčyna zhareła ŭ 1944 razam z domam: pry adstupleńnie niemcaŭ jany padpalili viosku.
Razam ź Jadvihaj Radziałkoŭskaj u Maładziečnie jon arhanizavaŭ mastackuju studyju. A siabroŭ Sajuza mastakoŭ było tak šmat, što chacieli navat abłasnoje adzdialeńnie sajuza zrabić u Maładziečnie.
Asabistaje žyćcio skaładasia niaprosta.
Jon chacieŭ dapamahčy dziaŭčynie, baćku jakoj savieckaja ŭłada zaličyła ŭ kułaki. Dumaŭ, što aženicca ź joj i vyratuje ad vysyłki. Tolki ŭsio skłałasia pa-inšamu.
Kastusia Charaševiča zhanili jak ziacia kułaka: vyklučyli z kamsamoła. Jany pierajechli ŭ Vilniu, dzie mierkavali znajści spakoj. Ale nie atrymałasia. A paśla i raźvialisia. Dziaciej nie mieli.
U druhim šlubie ŭ mastaka naradziŭsia syn. Jon adsłužyŭ u Afhanistanie, viarnuŭsia, ale zahinuŭ paźniej. Aficyjnaja viersija — vypaŭ z akna. Ale mastak byŭ schilny ličyć, što heta byŭ nie trahičny vypadak. Heta było adzinaje dzicia ŭ siamji.
Ad pačatku
Jaho tvory zachoŭvajucca ŭ Biełaruskaj biblijatecy imia Francyska Skaryny ŭ Łondanie, Nacyjanalnym mastackim muziei Biełarusi, Muziei sučasnaha vyjaŭlenčaha mastactva, Minskim abłasnym krajaznaŭčym muziei Maładziečna, Skandynaŭskim centry ŭ Minsku, a taksama ŭ pryvatnych zborach u Polščy, Hiermanii, ZŠA, Kanadzie i Izraili.
Aŭtar knihi ŭspaminaŭ «Źviedanaje i pieražytaje», 2004 hod.
Jon uhanaravany miedalom «Za zasłuhi ŭ vyjaŭlenčym mastactvie». U Maładziečnie dvojčy jaho pryznavali «Mastakom hoda».
