Prezydent Francyi Fransua Aland u dzień nacyjanalnaha śviata prezentavaŭ hałoŭnuju paštovuju marku krainy z abnoŭlenym symbałam Francuskaj respubliki — Maryjanaj — adnym z pravobrazaŭ dla stvareńnia jakoj stała liderka skandalna viadomaha ŭkrainskaha ruchu Femen Ina Šaŭčenka.
Marka z novym malunkam Maryjany była stvorana dvuma maładymi ilustratarami i fatohrafami: 33-hadovym Aliŭje Sijapa i 30-hadovym Davidam Kaviena. Prezydent Francyi vybraŭ pieramožcu z 15 varyjantaŭ, zahadzia adabranych admysłovym žury i navučencami licejaŭ.
«Dla tych, jakija pytajucca, chto staŭ madellu Maryjany: heta spałučeńnie roznych žanočych vobrazaŭ, ale ŭ asablivaści Iny Šaŭčenki, zasnavalnicy FEMEN» — napisaŭ paśla aficyjnaj cyrymonii Sijapa ŭ svaim mikrabłohu ŭ Twitter. Sijapa — aktyŭny zmahar za pravy homaseksualistaŭ.
Malunak Maryjany — maładoj žančyny ŭ fryhijskim kaŭpaku — staŭ nacyjanalnym symbalem Francyi ŭ 1792 hodzie. Dziaŭčyna ŭvasablaje nacyjanalny deviz Respubliki: «Svaboda, Roŭnaść, Braterstva».
Pavodle tradycyi, jakaja pačałasia ŭ 1944 hodzie, novy vyjavu Maryjany vybiraje prezydent Francyi. Raniej madellu dla Maryjany słužyli takija viadomyja francužanki, jak Bryžyt Bardo, Mirej Maćjo i Katryn Denioŭ.
Ina Šaŭčenka, jakaja na minułym tydni atrymała palityčny prytułak u Francyi, skazała našamu radyjo:
«Heta byŭ siurpryz, heta było zusim niečakana. Vielmi pryjemna ŭvajści ŭ historyju takim čynam. Ale najbolš pryjemny toj fakt, što ciapier, kožny raz, kali hamafoby, fašysty abo ekstremisty ŭ Francyi zachočuć vysłać list poštaj, im daviadziecca lizać „Femenu“ zad».
26-hadovaja Šaŭčenka pryjechała ŭ Francyju ŭ žniŭni 2012. Jana zajaviła žurnalistam, što rašeńnie padać prośbu ab palityčnym prytułku było dla jaje «stratehičnym» — prytułak maje pasłužyć dalejšamu raźvićciu ruchu, jakomu nieabchodna było ŭładkavacca ŭ niejkaj krainie. U vieraśni 2012 Femen adkryŭ u Paryžy svoj «treniravalny centar» dla aktyvistak «novaha feminisckaha ruchu».
Pavodle Šaŭčenki, va Ŭkrainie joj pahražaje pieraśled za adnu z akcyj u padtrymku źniavolenych u Rasiei udzielnic hrupy Pussy Riot, kali aktyvistki Femen śpiłavali draŭlany kryž.
Rašeńnie prezydenta Alanda adnosna novaj vyjavy Maryjany vyklikała škvał krytyki ŭ sacyjalnych sietkach u Francyi.