Pytańni «Narodnaha refierendumu» płanujecca abvieścić u vieraśni 2

Pytańni, jakija, pavodle zadumy inicyjataraŭ, možna vynieści na abmierkavańnie «Narodnaha refierendumu», buduć abvieščanyja ŭ siaredzinie vieraśnia. Pra heta aviedamiŭ namieśnik staršyni kampanii «Havary praŭdu!» Andrej Dźmitryjeŭ.

Nahadajem, inicyjatarami «Narodnaha refierendumu» vystupili kampanija «Havary praŭdu!», ruch «Za Svabodu» i Partyja BNF.

«Za dva miesiacy my abjechali 13 haradoŭ, u jakich sustrelisia i pahutaryli prykładna z tysiačču čałaviek. U płanach — da kanca leta abjechać jašče siem haradoŭ», — paviedamiŭ Dźmitryjeŭ. Pavodle jaho słoŭ, užo bačnyja temy, jakija «ludziej pa-sapraŭdnamu chvalujuć».

Siarod takich pytańniaŭ Dźmitryjeŭ vyłučyŭ try.

Pa-pieršaje, heta pytańnie jakaści i dastupnaści miedycynskaha absłuhoŭvańnia. Pa-druhoje, mahčymaść narmalna pracavać i zarablać hrošy. «Ludzi kažuć, što ekanamičnyja svabody i inicyjatyvy zacisnuty, što dziaržava dumaje nie pra toje, kab dapamahčy im zarabić, a pra miechanizm vyciskańnia hrošaj», — skazaŭ palityk.

Pa-treciaje, heta pytańnie niepadkantrolnaści ŭładaŭ. «Na dumku ludziej, čynoŭniki ŭsprymajuć svaju pracu jak prystupku da lepšaj, jany imknucca pakazać siabie dobrymi bolš vysokamu kiraŭnictvu ŭ Minsku, a nie kłapociacca pra raźvićcio rehijonaŭ i ich infrastruktury. Ludzi dastatkova vyrazna nazyvajuć takich pradstaŭnikoŭ ułady dačaśnikami», — zaznačyŭ Dźmitryjeŭ.

Z palityčnych pytańniaŭ, jakija, na dumku ludziej, mohuć być vyniesieny na «Narodny refierendum», Dźmitryjeŭ nazvaŭ abmiežavańnie terminaŭ prezidenctva i viartańnie da realnych paŭnamoctvaŭ parłamienta i niezaležnaści vybarčaj sistemy.

Praŭda, zaznačyŭ jon, hetyja pytańni bolš chvalujuć aktyvistaŭ demakratyčnych arhanizacyj.

Pavodle słoŭ namieśnika staršyni ruchu «Za Svabodu» Juryja Hubareviča, apošnim časam ludzi stali bolš adkryta iści na kantakt z apazicyjaj. «Kali raniej da pradstaŭnikoŭ apazicyi prostyja ludzi stavilisia z aściarohaj, to zaraz bačać u ich tych, chto hatoŭ uźnimać pytańni, što ich chvalujuć. Tak što, liču, pierśpiektyvy ŭ „Narodnaha refierendumu“ niebłahija», — skazaŭ jon.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH