Paśla masavych aryštaŭ i sudoŭ apošniaha tydnia maci palitźniavolenych vyrašyli abjadnać svaje namahańni. Da ich žadajuć dałučycca baćki dy inšyja svajaki socień biełaruskich palitviaźniaŭ, jakija adbyvajuć ciapier administratyŭnaje j kryminalnaje pakarańnie, znachodziacca pad śledztvam.
Inicyjatyva stvareńnia Kamitetu maci palitviaźniaŭ naradziłasia stychijna ŭ čerhach la ścien turmaŭ, u sudovych kalidorach, kali siemji aryštavanych prychilnikaŭ pieramien šukali svaich, abmieńvalisia pamiž saboj infarmacyjaj, razam vitali dziaciej la turmy na Akreścina, – paviedamiła maci adnaho z palitviaźniaŭ, Eła Hareckaja.
(Hareckaja: ) «Praca budzie ŭ tym, kab padtrymlivać usich, chto patraplaje ŭ turmy, usialakim čynam. Heta šmat pracy j nadoŭha».
Na hety čas užo ŭtvaryłasia dva vyraznyja koły takich aktyvistak, zacikaŭlenych u stvareńni svajoj struktury. Suviaź pamiž imi trymajecca pieravažna na asabistych i telefonnych kantaktach, a praź dzień-dva adbudziecca ŭstanoŭčy schod Kamitetu maci palitviaźniaŭ. Bližejšym časam jany źbirajucca sustrakacca z pradstaŭnikami AAN, ABSE, Čyrvonaha kryžu.
Havoryć adna ź inicyjatarak zasnavańnia Kamitetu žonka lidera apazycyi Alaksandra Milinkieviča Ina Kulej, syn jakoj, Ihar, adbyvaje administracyjnaje pakarańnie, 15 sutak, za ŭdzieł u akcyjach pratestu suprać niesumlennych vybaraŭ.
(Kulej: ) «Ideja paŭstała ad niekalkich baćkoŭ. Siarod ich jość vydatnyja arhanizatary j ahitatary. Adna ź ich – z chlebazavodu (pakul nia budu nazyvać proźvišča). Dyk hetaja žančyna paprostu mitynhi tam naładžvała j raskazvała, jak jaje, absalutna nie zaanhažavanuju ŭ palityku, syn navučyŭ nie bajacca. Heta narodnaja inicyjatyva takaja – z usich pa nicinie, jak kažuć».
Spadarynia Kulej miarkuje: pakul što ŭsie baćki zacikaŭleny adnym – jak dastavić svaim dzieciam-palitviaźniam charčovyja j rečavyja pieradačy. Adnak jana vieryć, što zhurtavańnie maci spatrebicca nia tolki ciapier, ale j paźniej, kali represii suprać ichnych dziaciej nabuduć inšyja formy. Istotna, što Ina Kulej maje vialiki dośvied hramadzkaj pracy, i hatova dzialicca svaimi vysnovami.
(Kulej: ) «Ciapier ja baču, što baćki daviarajuć mnie j jašče pary-trojcy takich žančyn. Heta paprostu takoje łobi. Ja dumaju, što hety kamitet samaarhanizujecca j budzie dziejničać. I taja sprava j praca, jakuju ja rabiła ŭsio žyćcio (hramadzkaja dziejnaść – u nas ža byŭ taki inkubatar, centar padtrymki hramadzianskich inicyjatyvaŭ), budzie dapamohaj – kab ludzi chutčej mahli arhanizavacca».
Žonka aryštavanaha lidera apazycyi Alaksandra Kazulina Iryna vitała hetuju inicyjatyvu:
(Kazulina: ) «Ja za stvareńnie takoha kamitetu. Liču, što heta vielmi pravilna. Ale tam musiać być nie abaviazkova žančyny – i mužčyny taksama. I nie abaviazkova tolki maci, a mohuć być i siabry asudžanych».
Baćka źniavolenaj studentki Ekanamičnaha ŭniversytetu Ivan Vaškievič taksama choča dałučycca da hetaj struktury:
(Vaškievič: ) «Jana budzie pryciahvać uvahu da tych parušeńniaŭ, što čyniacca. Pa-druhoje, jana budzie papiaredžvać takija fakty – kab ich bolš nie było».
