Byŭ niekali taki dziaržaŭny litaraturny časopis — «Pieršaćviet», stvorany na pačatku 90‑ych u jakaści dadatku da «Čyrvonaj źmieny». A va Ŭkrainie byŭ i jość časopis «Čietvier» — niedziaržaŭny, ale suhučny ź dziaržaŭnym pazytyŭnym smakavańniem maładoj litaratury. Časopis Biełaruskaha kalehijuma «Pamiž» isnuje ŭ mižrečyščy mienskaha litaraturnaha žyćcia. 5 vieraśnia adbyłasia prezentacyja šostaha numara «Pamiž» — badaj, samaha «zornaha» pa składzie.
Stan «pamiž» — uvohule stan niaŭdziačny: heta stan pošuku, a znajści možna i nia toje. Hadoŭ kolki tamu pieršyja navučency adździaleńnia filazofii & litaratury BK, pašyrajučy palatyvizm hetaj navučalnaj ustanovy, vynajšli nazoŭ časopisa, kab pierakazać hetym karotkim słoŭnym symbolem stan intelektujalnaha padmurku svajho pakaleńnia. Pakaleńnia, što paśpieła ŭ cyvilizavanych umovach skončyć «kołasaŭski» licej, nadychacca ŭviedzienaj u status dziaržaŭnaści biełaruščynaj, zakaraskacca ŭ hurby śviežych knižak, vydadzienych na rodnaj movie — i pastupova asensavać skon epochi biełaruskaj raźniavolenaści. Dla tahačasnych stvaralnikaŭ tvorčaha inkubatara — ciapier kulturolaha Ali Sidarovič, paetki Maryi Baradzinoj, pierakładčycy Taciany Urubleŭskaj, prazaika Eły Kuleš — stavałasia naturalnym znachodzić siabie siarod abrynutych na maładyja hałovy spadčyny «Tutejšych», emihranckaj litaratury, novatvoraŭ «Bum‑Bam‑Lita», pryniesienaj vykładčykami EHU zachodniaj filazofijaj dy dyskursami Akudoviča z Babkovym.
Ciapierašnija navučency BK dy aŭtary časopisa «Pamiž» — heta inšy śviet. Heta pakaleńnie, brutalnaść rečaisnaści jakoha robić druhasnymi knižnyja kaštoŭnaści, a z kolišniaj palitry aryjentyraŭ pakidaje najznačniejšyja. Pakaleńnie, da jakoha zachodniaja kultura nabliziłasia tak ščylna, što žadańnie pierakładać macniejšaje za žadańnie pramaŭlać svajo. Nia dziva, što na staronkach numara hučać hałasy Trumena Kapote dy Ani Samon, u prysutnaści jakich užo zhavoranymi padajucca naturalnyja biełaruskija refleksii. Dyj sam Biełaruski Kalehijum ciapier, jak źjava, apynuŭsia na terytoryi pamiž — pamiž uparadkavanaj niekali sistemaj nacyjanalnych kaštoŭnaściaŭ, jakaja dla maładych intelektuałaŭ maralna sastareła, dy zvyčajnym žyćciom krainy, što ŭpryhožyła isnavańnie hetych samych maładych intelektuałaŭ lohkim velumam bilinhvizmu. Ciapierašnija navučency BK prychodziać u prastoru pamiž sa zvyčajnaha pobytavaha žyćcia, u jakim bolšaść knižak čytajecca pa‑rasiejsku, a muzyka słuchajecca pieravažna pa‑anhielsku. Dy prastora pamiž staje zrealizavanaj prahaj albo addać naležnaje biełaruščynie, albo pašukać svaje kropki ŭzajemadačynieńnia ź joj. Časam adno na placoŭcy pamiž i mahčyma pakinuć svaje tvory, vyrablenyja pa‑biełarusku.
Przentacyja šostaha numaru časopisa «Pamiž» adbyłasia na bierazie voziera Drazdach, pad vosieńskim soniejkam, pačaŭšysia pramovaj filozafa Piotry Rudkoŭskaha, impetnym čytańniem novych vieršaŭ Andrejem Chadanovičam, Hlebam Łabadzienkam, Vikaj Trenas dy śpievami Taciany Biełanohaj, a skončyłasia perfomansam ad pana Skirhajły dy spažyvańniem la vohnišča ŭlubionaha kalehijumaŭskaha charču — piva z sasiskami.
Znajści šosty numar časopisa «Pamiž» možna na vystavie Siadziby BNF, u halerei «Padziemka», kniharni «Viedy», a taksama na haradzkich knižnych kirmašach.
