ANT, 21.05
Drakuła miortvy i zadavoleny (Dracula: Dead and Loving It)
ZŠA – Francyja, 1995, kalarovy, 88 chv.
Režyser: Meł Bruks
Roli vykonvajuć: Leśli Nilsen, Meł Bruks, Piter MakNikoł, Styven Ŭeber, Emi Jasbek, Lizet Entani
Žanr: Parodyja na filmy žachaŭ
Adznaka: 7 (z 10)
Hraf Drakuła ŭ pošukach śviežaj kryvi traplaje ŭ Londan. Upyra pieraśleduje niaŭrymślivy doktar Van Chielsynh (Meł Bruks)…
Daścipnaja parodyja Meła Bruksa na vampirskuju kinaklasyku.
Ikłasty vampir u vykanańni sivahałovaha Leśli Nilsena – hłybakadumna-prydurkavaty i tancavalna-badziory, dasłoŭnyja paŭtory z “Drakuły” Toda Braŭninha vyklikajuć histeryčny śmiech, a Meł Bruks hanarliva nosicca z asinavym kałom.
Cikava, što Leśli Nilsen raspačynaŭ karjeru ŭ surjoznaj kinafantastycy (“Zabaronienaja planeta”) – ale słavu jamu prynieśli mienavita kamedyjnyja roli. Meł Bruks užo ździekvaŭsia z kinakašmaraŭ u “Maładym Frankienštejnie”. “Drakuła miortvy” nie nastolki vytančany, ale ŭsio roŭna žudasna-śmiešny.
BT, 23.50
Horkaja poŭnia (Bitter Moon)
Francyja – Vialikabrytanija, 1992, kalarovy, 138 chv.
Režyser: Raman Pałanski
Roli vykonvajuć: Hju Hrant, Emanuel Seńje, Piter Kajot, Krystyn Skot-Tomas, Viktar Banerže
Žanr: Drama
Adznaka: 7 (z 10)
Na karabli invalid-kalasačnik (Piter Kajot) raspaviadaje maładomu pasažyru (Hju Hrant) pra svaju kachanuju (Emanuel Seńje) – jak jon paznajomiŭsia ź biaźvinnaju dziaŭčynaj, u jakija niebiaśpiečnyja hulni jany ihrali – i da čaho dajšli ŭ pošukach asałody. Pasažyr u šoku, alo i jon, i jahonaja žonka ŭžo ŭciahnutyja ŭ čužyja žarści…
Karcina Pałanskaha vyklikała niepryjaznaść krytyki – i zachapleńnie ŭ hledačoŭ. Hledačoŭ vabili skandalnyja seksualnyja sceny, estety plavalisia ad zalimitnaje pošłaści, da jakoj skaciŭsia majstar Pałanski.
Ale režyser pastupaje z hledačami tak, jak i invalid-jurliviec z hierojem Hju Hranta – pryviazvaje nieprystojnym apaviadańniem. Za dzikunskim kičam stojeny sarkazm i ironija stvaralnika “Tupika” i “Balu vampiraŭ”. Ale hety sarkazm hublajecca ŭ žanočych uschlipach – film raźličany na masavuju aŭdytoryju vychavancaŭ seksualnaje revalucyi.
