Rok-muzykant ź Vialikabrytanii Kien Chenśli, były ŭdzielnik suśvietna viadomaha hurtu Uriah Heep, paviedamiŭ u internecie, što biełaruskija ŭłady zabaranili jahony vystup u Minsku, zapłanavany na 16 žniŭnia, i tamu jon u Biełaruś nie pryjedzie.
«Pryvitańnie ŭsim. Na žal, u mianie drennyja naviny. Kancert Ken Hensley & Live Fire Open Air Show u Minsku admienieny. Jaho zabaranili biełaruskija ŭłady. Prynošu vybačeńni ŭsim, chto źbiraŭsia iści ci nabyŭ kvitki», — napisaŭ muzyka ŭ Fejsbuku.
15 žniŭnia pradpryjemstva «Cienci», jakoje zaprašała Kiena Chenśli ŭ Minsk dla ŭdziełu ŭ cyrymonii ŭručeńnia muzyčnaj premii rok-klubu TNT, paćvierdziła infarmacyju pra jahony niepryjezd, patłumačyła pryčyny i abviaściła pra mahčymaść atrymać nazad hrošy za kvitki.
Pavodle sajtu tntrock.by, vystup Kiena Chenśli i hrupy Live Fire byŭ zapłanavany ŭ miežach uručeńnia «Premii TNT» na płacoŭcy parku «Drymłend».Mierapryjemstva pavinna było pačacca 16 žniŭnia a 18-j, a vystup Kiena Chenśli płanavaŭsia na čas paśla 21.00 ciaham dźviuch hadzin. Adnak pravodzić mierapryjemstva paśla 21.00 zabaraniŭ Minharvykankam. Upraŭleńnie ideałahičnaj pracy, kultury i spraŭ moładzi Minharvykankama 12 žniŭnia dasłała pradpryjemstvu «Cienci» list, u jakim abmiežavała čas «...u suviazi sa šmatlikimi zvarotami hramadzian u pytańni ab zachoŭvańni hukavoha režymu padčas praviadzieńnia kulturna-masavych mierapryjemstvaŭ na terytoryi parku «Drymłend».
U vyniku pradpryjemstva «Cienci» zajaviła, što pieranosić uručeńnie «Premii TNT» u pamiaškańnie baru kłubu, i prapanavała tym, chto ŭžo nabyŭ kvitki, viarnuć za ich hrošy.
Atrymać kamientaryj va ŭpraŭleńni ideałahičnaj pracy, kultury i spraŭ moładzi Minharvykankama nie ŭdałosia. Čynoŭniki, da jakich udałosia dazvanicca, adpravili da namieśnicy načalnika ŭpraŭleńnia Vitaliny Rudzikavaj, čyj telefon nie adkazaŭ.
