Siońnia pačynajecca novy sud nad byłym palitviaźniam.
Uładzimira Jaromienka abvinavačvajuć u parušeńni praviłaŭ previentyŭnaha nahladu. Jamu pahražaje da hoda pazbaŭleńnia voli. Praces nad byłym palitviaźniam projdzie ŭ sudzie Pieršamajskaha rajona Minska, jaki znachodzicca na vulicy Tałbuchina, 9. Pačatak — a 14:30.
Nahadajem, aktyvist «Maładoha frontu» Uładzimir Jaromienak ŭ studzieni 2011 hoda byŭ aryštavany jak padazravany pa spravie «ab masavych biesparadkach». Byŭ asudžany na try hady. Adbyvaŭ pakarańnie ŭ kałonii pad Viciebskam. U žniŭni 2011 hoda ŭ liku inšych fihurantaŭ byŭ pamiłavany. Z tych časoŭ jašče niekalki razoŭ apyniaŭsia za kratami pa administracyjnych artykułach za ŭdzieł u akcyjach pratestu.
15 sakavika 2013 hoda sud Pieršamajskaha rajona Minska na 6 miesiacaŭ padoŭžyŭ previentyŭny nahlad u dačynieńni da aktyvista, jaki byŭ uviedzieny hod nazad.
14 lipienia, u dzień viančańnia maładafrontaŭca, jamu patelefanavaŭ śledčy i nastojliva paprasiŭ źjavicca ŭ paniadziełak. Jaromienak damoviŭsia pieranieści razmovu na dva dni. 16 lipienia jamu pradjavili pastanovu ab zaviadzieńni kryminalnaj spravy pa artykule 421 «Parušeńnie previentyŭnaha nahladu», datavany 24 maja.
