Uładzisłaŭ Baŭmhiertnier — adzin z topavych rasijskich menedžaraŭ.
Jak paviedamiŭ načalnik adździeła pa suviaziach z hramadskaściu «Urałkalija» Alaksandra Babinskaha, Baŭmhiertnier znachodziŭsia ŭ Biełarusi pa piśmovym zaprašeńni Michaiła Miaśnikoviča. Sustreča adbyłasia, a paśla jaje hiendyrektar byŭ zatrymany, vylatajučy ź Minska.
* * *
Śledčy kamitet rasśleduje kryminalnyja spravy ŭ dačynieńni da słužbovych asob ZAT «Biełaruskaja kalijnaja kampanija», paviedamili BIEŁTA ŭ adździele infarmacyi i suviazi z hramadskaściu SK Biełarusi.
«Śledčym kamitetam Respubliki Biełaruś rasśledujucca kryminalnyja spravy, raspačatyja Hienieralnaj prakuraturaj pa č.3 art.424 „Złoŭžyvańnie ŭładaj i słužbovymi paŭnamoctvami“ KK (ad 3 da 10 hadoŭ z kanfiskacyjaj majomaści abo biez kanfiskacyi) u dačynieńni da słužbovych asob ZAT» Biełaruskaja kalijnaja kampanija «(ZAT» BKK «): staršyni naziralnaj rady — Uładzisłava Baŭmhiertniera, člena naziralnaj rady — Aleha Piatrova, pieršaha namieśnika hienieralnaha dyrektara — Kanstancina Saładoŭnikava, namieśnika hienieralnaha dyrektara pa finansach — Ihara Jeŭstratava, načalnika frachtavaha adździeła — Dźmitryja Samojłava i inšych asob», — rastłumačyli ŭ kamitecie.
U SK dadali, što padstavaj dla raspačynańnia kryminalnych spraŭ pasłužyli materyjały ab ździajśnieńni hetymi ludźmi vidavočnych złoŭžyvańniaŭ słužbovymi paŭnamoctvami ŭ karyślivych metach, jakija paciahnuli naniasieńnie istotnaj škody dziaržaŭnym i hramadskim intaresam Respubliki Biełaruś, a taksama naniasieńnie škody ŭ asabliva bujnym pamiery AAT «Biełaruśkalij» i ZAT «BKK». «Na padstavie najaŭnych dokazaŭ i inšych faktyčnych materyjałaŭ Śledčym kamitetam vyniesieny pastanovy ab pryznańni nazvanych asob abvinavačanymi», — taksama paviedamili ŭ viedamstvie.
Staršynia naziralnaj rady ZAT «BKK» Uładzisłaŭ Baŭmhiertnier zatrymany, u dačynieńni da jaho abranaja miera strymańnia ŭ vyhladzie zaklučeńnia pad vartu. Piatroŭ, Saładoŭnikaŭ, Jaŭstrataŭ, Samojłaŭ abvieščanyja ŭ vyšuk, u tym liku pa linii Interpoła.U chodzie rasśledavańnia kryminalnych spraŭ Śledčym kamitetam vyśviatlajucca i dakumientujucca inšyja fakty supraćpraŭnaj dziejnaści vyšejzhadanych i inšych słužbovych asob ZAT «BKK».