Nahadajem, što mienavita paśla pryjezdu kardynała Bertone ŭ Biełaruś u 2009 hodzie adbyŭsia vizit Alaksandra Łukašenki ŭ Vatykan i jahonaja aŭdyjencyja z papam Bieniedyktam, na jakoj prysutničaŭ taksama jahony syn Mikałaj.
31 žniŭnia Francišak pryniaŭ adstaŭku kardynała Tarčyzia Bertone z pasady Dziaržsakratara Jaho Śviataści Papy. Pantyfik paprasiŭ jaho zastacca na hetaj pasadzie da 15 kastryčnika 2013 hoda. Adnačasova Śviaty Ajciec pryznačyŭ novaha Dziaržsakratara, jaki pačnie vykonvać svaje abaviazki z 15 kastryčnika. Im staŭ arcybiskup Pjetra Paralin, da hetaha času Apostalski nuncyj u Vieniesuele. Ab hetym Francišak paviedamiŭ kiraŭnikam i supracoŭnikam Dziaržsakrataryjata padčas aŭdyjencyi, na jakoj pryniaŭ ich u Domie Śviatoj Marty.
Papa padziakavaŭ kardynału Bertone za słužbu na karyść Śviatoha Pasadu i ŭ jakaści jaho asabistaha pradstaŭnika.
Novy Dziaržsakratar naradziŭsia ŭ 1955 h. na poŭnačy Italii. Atrymaŭ śviatarskaje paśviačeńnie ŭ 1980 h., a zatym praciahvaŭ vučobu ŭ halinach kananičnaha prava i dypłamatyi ŭ Papskim Hryharyjanskim univiersitecie. Z 1986 h. znachodzicca na dypłamatyčnaj słužbie Śviatoha Pasadu. U 2002 h. byŭ pryznačany namieśnikam Sakratara.
U vieraśni 2009 h. Benedykt XVI pryznačyŭ jaho Apostalskim nuncyjem u Vieniesuele i ŭdzialiŭ jamu biskupskuju sakru.
Kardynału Bertone — 79 hadoŭ. Jon uznačalvaŭ Dziaržsakrataryjat z 2006 h. Ź jahonym imiem źviazvali šerah skandałaŭ u Vatykanie.
