Taktyka Pucina na postsavieckaj prastory moža mieć advarotny efiekt. Čym bolš Rasija ciśnie na susiednija krainy, tym bolš jana nastrojvaje ich suprać siabie. A Jeŭropa ŭ vyniku zbližajecca ź imi — jak ciapier adbyvajecca z Ukrainaj. Pra heta piša brytanskaja hazieta «Fajnenšeł tajms».
Jana adznačaje, što adnosiny Rasii z susiedziami ŭ apošni čas pachaładali. Pryčym heta zdaryłasia nie tolki ŭ adnosinach z Ukrainaj i Małdovaj — ich Rasija šantažuje handlovymi vojnami i prablemami z Prydniastroŭjem, u vypadku kali jany padpišuć Damovu ab asacyjacyi ź ES. Toje samaje adbyłosia ź Biełaruśsiu, dzie kanflikt vyklikali dziejańni ahresiŭnaha rasijskaha kapitału.
U lipieni «Urałkalij» vyjšaŭ z ekspartnaha kartela z «Biełaruśkalijem». Heta abrynuła ceny na asnoŭny ekspartny tavar Biełarusi — kalijnuju sol. Biełaruś adkazała aryštam hiendyrektara «Urałkalija», piša «FT».
Budučy samaj aŭtakratyčnaj dziaržavaj Jeŭropy, Biełaruś nie maje šancaŭ na intehracyju ź ES, piša hazieta. Ale Kreml usio adno maje na jaje zub za inšaje. Pa-pieršaje, Rasiju razdražniaje, što Minsk šukaje finansavaj dapamohi ŭ Kitai, a pa-druhoje, što Łukašenka nie vykazvaje naležnaj pavahi da Pucina, prytym što Pucin ličyć jaho prosta svaim vasałam.
U cełym ža apošnija kanflikty, na dumku haziety, pakazvajuć, što mahčymaści ŭpłyvu Rasii navat na słavianskija respubliki byłoha SSSR abmiežavanyja, a pryvabnaść rasijskaj madeli — nizkaja.
