BRSM rychtujecca adśviatkavać svajo 11-hodździe. Z hetaj nahody najbujniejšaja ŭ Biełarusi arhanizacyja praviała pampieznuju pres-kanfierencyju, na jakoj padzialiłasia vynikami pracy.
Rychtujuć kadry dla milicyi
Pieršy sakratar Centralnaha kamiteta BRSM Ihar Buzoŭski paviedamiŭ pra prajekty arhanizacyi: znajomyja ŭsim akcyi «Za Biełaruś», «Kvitniej, Biełaruś», «Załataja šajba», «Karaleva Viasna».
Mnoha ŭvahi było nadadziena moładzievym atradam achovy pravaparadku — važnamu, pavodle słovaŭ Buzoŭskaha, nakirunku dziejnaści BRSM, jaki dazvalaje pavysić pravavuju piśmiennaść moładzi, pravodzić prafiłaktyku pravaparušeńniaŭ, pracavać sa «składanaj» moładździu, rychtavać kadry dla dalejšaj słužby ŭ vojsku i siłavych strukturach i navučańnia ŭ vnu siłavych struktur.
Buzoŭski skazaŭ, što samaja važnaja padziaka MAAP — ad ludziej, jakija mohuć spakojna chadzić pa vulicach
Atrymlivajuć 1 000 dalaraŭ u miesiac
Buzoŭski ŭchvaliŭ niadaŭni ŭkaz Łukašenki, jaki dazvoliŭ budaŭničym atradam pracavać kruhły hod, a nie tolki letam. Kiraŭnik BRSM paviedamiŭ, što dla pracaŭnikoŭ budatradaŭ arhanizacyja budzie damahacca pavyšeńnia siaredniaha zarobku da 1 000 dalaraŭ u miesiac.
Pavodle Buzoŭskaha, takija hrošy dla budatradaŭ BRSM užo nie mara. Letaś takija zarobki atrymlivali členy pracoŭnych atradaŭ BRSM na budaŭnictvie novaha štaba Nacyjanalnaha alimpijskaha kamiteta, Astravieckaj AES, škoł u Salihorsku i Maładziečnie.
Zapuskajuć novy sajt i radyjostancyju
Na pres-kanfierencyi było zajaŭlena, što da narodzinaŭ BRSM sajt arhanizacyi abnaviŭ dyzajn sajtu, jaki stanie bolš sučasnym, moładzievym i prystasavanym dla mabilnych pryładaŭ. Biełaruskaj movy na sajcie pakul što nie płanujecca. Niama biełmoŭnaj viersii i na ciapierašniaj viersii.
Jašče adnoj navinoj staŭ zapusk novaj radyjostancyi ad BRSM pad nazvaj «Dušievnoje radio». Na hetaj radyjostancyi dla maładych buduć stavić chity 80-ch i 90-ch ź Biełarusi i zamiežža.
BRSM užo vałodaje radyjostancyjaj «Piłot FM», adnak dyrektar hetaj radyjostancyi Anatol Čepikaŭ skazaŭ, što členy BRSM, jakija pryjšli ŭ arhanizacyju dziesiać hadoŭ tamu, vyraśli z farmatu «Piłota», tamu dla ich budzie pracavać novaja stancyja.
10 miljonaŭ za pieśniu
Padčas pres-kanfierencyi Buzoŭski abvieściŭ konkurs na pieśniu dla BRSM, jakuju zapuściać u efir abiedźviuch radyjostancyj. Pieśnia pavinna natchniać i matyvavać moładź, być patryjatyčnaj. Hałoŭny pryz konkursu — 10 miljonaŭ rubloŭ, jakija musiać pakryć vydatki na zapis pieśni.
Adnu z takich piesień tut ža i praśpiavaŭ bard Anatol Dłuzski.
4,5 miljona dalaraŭ — mizernaja suma
U pačatku pres-kanfierencyi Buzoŭski skazaŭ, što «dzień naradžeńnia BRSM užo pačaŭ asacyjavacca z dniom moładzi ŭ Biełarusi». Paźniej, havoračy pra finansavańnie arhanizacyi, lidar BRSM dadaŭ, što 4,5 miljona dalaraŭ, jakija atrymała arhanizacyja na svaju dziejnaść ad urada — heta mizernaja suma, jakaja idzie na finansavańnie amal ŭsioj moładzievaj palityki ŭ krainie.
«Hetyja hrošy nie dastajucca nam prosta tak. My atrymlivajem ich u vyhladzie hrantaŭ na prajekty. Heta ciažkaja praca, i z nami pastajanna kankurujuć inšyja hramadskija arhanizacyi. Siońnia lubaja moładzievaja HA moža padać zajaŭku na hrant. Adnak pieravahu addajuć nam, bo sietka BRSM moža vyrašać šyrejšy śpis prablem i kaeficyjent karysnaj dziejnaści ad układzienych hrošaj u nas vielmi vysoki,« — skazaŭ jon.
BRSM atrymlivaje hrošy ad Rasii
«My taksama atrymlivajem hrošy ad členskich unioskaŭ — 10 tysiačaŭ raz u 6 miesiacaŭ. U nas 500 tysiačaŭ členaŭ, i my puskajem hetyja hrošy tolki na prajektnuju dziejnaść. My atrymlivajem hranty i z Rasii. Nieŭzabavie na rasijski hrant my praviadziem fiestyval moładzi sajuznaj dziaržavy».
