Kamitetam dziaržaŭnaj biaśpieki Biełarusi spynieny tranzitny kanał pastaŭki narkatyčnych srodkaŭ u krainy Jeŭrasajuza.
Jak paviedamiła pres-słužba KDB, padčas praviadzieńnia kompleksu apieratyŭna-vyšukovych mierapryjemstvaŭ byli ŭstanoŭleny atrymalniki hruzu i vyjaŭlena miesca časovaha zachoŭvańnia narkatyčnych srodkaŭ na terytoryi Biełarusi. Padčas zakładki narkotykaŭ u tajnik, raźmieščany kala aŭtadarohi Mahiloŭ — Mścisłaŭ, supracoŭnikami KDB i bajcami śpiecpadraździaleńnia KHB «Alfa» zatrymany troje ŭdzielnikaŭ mižnarodnaj złačynnaj hrupy, jakaja składałasia z hramadzian Kazachstana i Rasii (abodva ŭradžency Čačni), a taksama hramadzianina Tadžykistana. U vyniku ahladu miesca zdareńnia znojdzieny i kanfiskavany polietylenavyja skrutki z asabliva niebiaśpiečnym narkatyčnym srodkam hierainam.
Zhodna z atrymanaj infarmacyjaj, partyja narkotykaŭ masaj 27,5 kh pryznačałasia dla dalejšaj realizacyi ŭ krainach Zachodniaj Jeŭropy. Aryjencirovačny košt kanfiskavanaha hierainu na čornym rynku — bolš za 3 młn. dołaraŭ ZŠA.
U dačynieńni da zatrymanych upraŭleńniem KDB pa Mahiloŭskaj vobłaści raspačata sprava pavodle prykmiet złačynstva, praduhledžanaha č. 3 art. 328 KK (niezakonny abarot narkatyčnych srodkaŭ, psichatropnych rečyvaŭ, ich prekursoraŭ i anałahaŭ). Sankcyja artykuła praduhledžvaje pazbaŭleńnie voli ad 8 da 13 hadoŭ.
