Apoŭdni 24 vieraśnia z budynka na vulicy Miaśnikova, 25, viadomaha minčukam i haściam stalicy jak «Dańkoŭ- kłub», pačałosia vysialeńnie kazino.
Da hmacha spačatku prybyli ŭładalniki budynka — pradstaŭniki «Biełaruskaha tavarystva hłuchich», u jakoha kłub arandavaŭ 6-paviarchovy budynak ciaham 20 hadoŭ. Siońnia z budynka pavinny być vyviezienyja ŭsie rečy arandatara.
Pra toje, što kłubu nie praciahvajuć damovu arendy, žonka ciapier padślednaha ŭładalnika kłuba Juryja Dańkova Natalla daviedałasia niadaŭna.
Dla jaje stała niečakanaściu toje, što zabrać kłub u ich mohuć prosta padčas śledstva.
Pa słovach Mikałaja Kułakova (staršyni PUP «Vitok», što ŭvachodzić u Biełaruskaje tavarystva hłuchich), nie praciahnuli damovu z uładalnikami «Dańkoŭ-kłuba» ŭčora.
Pryčyna — niavypłata arendy za 2 miesiacy.
Pavodle Kułakova, usie dakumienty pa arendzie budynka znachodziacca ŭ śledstva.
«Ahulnaja zapazyčanaść — 836 młn rubloŭ. Akramia taho, vialikija narakańni da „Dańkoŭ-kłuba“ mieła pažarnaja słužba. „Dańkoŭ-kłub“ taksama nie vykanaŭ pradpisańnie Maskoŭskaha vykankama, pa jakim treba było pafarbavać fasad, azielanić terytoryju i h.d. Jašče jany zrabili rekanstrukcyju budynka biez našaha dazvołu», — skazaŭ Mikałaj Kułakoŭ.
Pavodle jaho słoŭ, budynak ciapier budzie časova naležać PUP «Vitok». Praź miesiac, pa słovach Kułakova, budynak vystaviać na aŭkcyjon.
Nahadajem, hod tamu, 4 vieraśnia 2012 h., byŭ zatrymany biźniesmien Juryj Dańkoŭ — uładalnik zabaŭlalnaj ustanovy «Dańkoŭ- kłub» . Praź niekalki dzion jamu było pradjaŭlenaje abvinavačvańnie ŭ ździajśnieńni złačynstva, praduhledžanaha č. 2 art. 171 KK (vykarystańnie zaniatkam prastytucyjaj abo stvareńnie ŭmovaŭ dla zaniatkaŭ prastytucyjaj, učynienyja słužbovaj asobaj z vykarystańniem svaich słužbovych paŭnamoctvaŭ).
19 žniŭnia rasśledavańnie było zavieršana: kančatkovaje abvinavačańnie pradjaŭlena adrazu pa siami artykułach Kryminalnaha kodeksa:
uchileńnie ad vypłaty padatkaŭ, arhanizacyja i ŭtrymańnie prytonu, uciahvańnie ŭ prastytucyju, demanstracyja parnahrafii, padrobka dakumientaŭ, falsifikacyja dokazaŭ pa hramadzianskaj spravie.
18 vieraśnia nad Juryjem Dańkovym pačaŭsia sud, jon prachodzić u zakrytym režymie.
