Pra heta zajaviŭ kiraŭnik departamentu Rasiei, «Uschodniaha partnerstva», Centralnaj Azii, rehijanalnaha supracoŭnictva i ABSE ŭ Eŭrapiejskaj słužbie źniešnich dziejańniaŭ Hunar Vihand, paviedamlaje radyjo «Svaboda».
Vysoki eŭrapiejski čynoŭnik znachodziŭsia 24–25 vieraśnia ź vizytam u Miensku. Jon pravioŭ pieramovy z pradstaŭnikami MZS i demakratyčnaj supolnaści Biełarusi.
Hunar Vihand — upłyvovy čynoŭnik z aparatu kiraŭnicy źniešniaj palityki Eŭraźviazu Ketryn Eštan.
Andrej Dźmitryjeŭ, adzin ź lideraŭ hramadzianskaj kampanii «Havary praŭdu», niepasredna razmaŭlaŭ z bruselskim čynoŭnikam: «Spadar Vihand skazaŭ, što na siońniašni dzień Eŭraźviaz adkryty dla supracy ź Biełaruśsiu.
My razmaŭlali pra košt šenhienskich vizaŭ. I jon skazaŭ, što źnizić ich košt možna imhnienna, jak tolki biełaruski bok padpiša dakumenty, źviazanyja z takoj prapanovaj Eŭraźviazu. I tady vizy buduć kaštavać udvaja tańniej.
I heta budzie vyhadna ŭsim — i biełarusam, i eŭrapiejcam». Andrej Dźmitryjeŭ skazaŭ, što ŭdzielniki sustrečy prapanoŭvali, kab Brusel, nie čakajučy zhody biełaruskich uładaŭ, źmienšyŭ košt ujaznych dakumentaŭ u adnabakovym paradku.
Adnak spadar Vihand adkazaŭ, što takija rečy niemahčyma rabić biaz zhody aficyjnaha Miensku.
«I heta sapraŭdy tak», — kaža «Svabodzie» dyrektarka ofisu «Za demakratyčnuju Biełaruś» u Bruseli Volha Stužynskaja, jakaja daŭno zajmajecca hetaj prablemaj:
«Eŭrakamisija ŭžo amal dva hady tamu dasłała biełaruskim uładam zaprašeńnie pačać pieramovy pra vizavuju fasilitacyju i readmisiju. Tamu što košt vizy moža być źnižany da 35 ź ciapierašnich 60 eŭra tolki pry ŭmovie, što biełaruski bok pahodzicca na hety dyjaloh.
Heta mahčyma tolki, kali abodva baki pahadžajucca. U adnabakovym paradku Eŭraźviaz nia moža takoha zrabić. Tamu što heta damova».
«Biełaruskija ŭłady naŭmysna nie pačynajuć adpaviednych pieramovaŭ», — kaža palitolah Aleś Łahviniec:
«Dla ŭładaŭ Biełarusi supracoŭnictva z Eŭrapiejskim Źviazam nia jość pryjarytetam. Jany b nie chacieli šyrejšych kantaktaŭ hramadzianaŭ Biełarusi z hramadzianami krain Eŭrapiejskaha Źviazu. Navat z apošnich zajavaŭ Łukašenki bačna, što jon choča prypynić častyja vandroŭki biełarusaŭ za miažu dziela nabyćcia tavaraŭ štodzionnaha popytu.
Heta ekanamična niavyhadna režymu. I hetym usio tłumačycca. I druhoje — ja ŭpeŭnieny, kali biełarusy buduć volna vandravać u krainy blizkaha zamiežža za našaj zachodniaj miažoj, to jany buduć paraŭnoŭvać stanovišča tut i tam i zadavać pytańni. Tamu tut usio zrazumieła. Dziaržava choča kantralavać svaich hramadzianaŭ i nia choča rabić takija sastupki.
Heta robicca na škodu intaresam Biełarusi i jaje prostych hramadzianaŭ».
Vysoki eŭrapiejski čynoŭnik, darečy, paviedamiŭ, što damova ab palahčeńni vizavaha režymu i ab readmisii Eŭraźviazu z Armenijaj chutka ŭstupić u siłu.
Na samicie «Ŭschodniaha partnerstva» ŭ Vilni naprykancy listapada planujecca padpisać padobnyja dakumenty z Azerbajdžanam.
I tady Biełaruś zastaniecca ŭ najhoršym stanoviščy z usich šaści krain «Uschodniaha partnerstva».
Andrej Dźmitryjeŭ kaža, što patrabavańnie z boku Brusela da biełaruskich uładaŭ vyzvalić usich palityčnych viaźniaŭ zastajecca niaźmiennym:
«Spadar Vihand padkreśliŭ, što asnoŭnaj umovaj pačatku sapraŭdnaha dyjalohu i tych mahčymaściaŭ, jakija Biełaruś moža atrymać ad Eŭraźviazu, źjaŭlajecca vyzvaleńnie palityčnych viaźniaŭ.
I jašče vielmi važna, što jon padkreślivaŭ: Eŭraźviaz čakaje, što ŭ Biełarusi nia buduć źjaŭlacca novyja palityčnyja viaźni. Tamu što vielmi važna vyzvalić nia tolki tych, chto ŭžo jość, ale i nie praciahvać takuju praktyku».
