Scena pahoni, źniataja na praśpiekcie Niezaležnaści (ŭ časie zdymak — Francyska Skaryny).
Scena pahoni, źniataja na praśpiekcie Niezaležnaści (ŭ časie zdymak — Francyska Skaryny). U kadry bačnyja rasijskija aŭto UAZ i «Vołha».
Scena, źniataja ŭ aeraporcie Minsk-2, na tabło bačnaje słova «srieda».
Kala Vaładarki «vyraśli» palmy.
Kala Vaładarki «vyraśli» palmy.
Zdymačnuju hrupu puścili dla zdymak na terytoryju turmy.
Ciapier heta hučyć jak siensacyja albo ekzotyka, ale naprykancy 1990-ych u Minsku aktyŭna pracavali amierykanskija kiniemathrafisty.
Znojdzieny błohieram darriuss'am film «Lima: tyja, chto sarvaŭsia z łancuha» ŭvohule ździviŭ internaŭtaŭ — apynułasia, što ŭ 1998 hodzie ŭ Minsku zdymali… stalicu Pieru i navat Ńju-Jork.
Film Mienachema Hołana byŭ pryśviečany paŭstancam Pieru, jakija zachapili ŭ zakładniki čalcoŭ uradu i dypłamataŭ i patrabavali vypuścić palityčnych źniavolenych.
«Lima» zroblena ŭ žanry bajavika, film bieź ciažkaści znachodzicca ŭ internecie.
Što ździŭlaje biełaruskaha hledača, dyk heta da bolu znajomyja piejzažy pieruanskich vulic — jak iranična zaŭvažajuć karystalniki interneta, u aeraporcie Limy («Minsk-2») na tabło možna ŭbačyć nadpis «Srieda», i daviedacca, što na toj samy dzień zapłanavany rejs u Krasnadar.
Sceny pahoni na vulicach Limy taksama ŭražvajuć — u roli pieruanskaj stalicy «zdymalisia» praśpiekt Niezaležnaści, vulica Čyrvonaja, Płošča Svabody, «stary horad» — vulica Enhielsa i Handlovaja. Asobna treba ŭzhadać i pra biesprecedentny vypadak — zdymačnuju hrupu puścili navat u sumnaviadomuju turmu na vulicy Vaładarskaha.
«Nasamreč Hołan źniaŭ u Minsku nie adzin film, tut było źniata cełych piać stužak, — raskazaŭ «NN» akcior Alaksandr Kašpieraŭ, jaki vykanaŭ u filmie „Lima“ rol rasijskaha ambasadara. — Vidać, heta było ekanamična vyhadna i tanna, zdymać u Minsku».
Uspaminy pra zdymki «Limy» u spadara Kašpierava vyklučna pryjemnyja.
«Amierykancy byli nadzvyčaj pracavityja, my pačynali zdymać, a 8-j i pracavali pa dvanaccać hadzinaŭ, — uzhadvaje akcior. — Hałoŭnaj prablemaj była mova, anhlijskuju my viedali nie vielmi dobra, tamu davodziłasia karystacca pasłuhami pierakładčykaŭ.
Što tyčycca interjeraŭ, dyk amierykanskim hledačam śpiecyfika Minska, zrazumieła, u vočy nie kidajecca. Tamu źniać Limu tut nie było nijakich prablem, u rešcie rešt, u Minsku i Ńju-Jork źniać možna».
Ńju-jorkskija sceny ŭ Biełarusi taksama zdymalisia — z razbora filma Darriuss'am vynikaje, što ŭ adnoj sa scen u Ńju-Jorku hałoŭny hieroj karystajecca taksi marki «Vołha» słužby 081, a pamiežny kantrol u aeraporcie Džona Kienedzi da bolu pa svaim azdableńni nahadvaje «Minsk-2».
«Lima», jakuju nie vielmi vysoka acanili krytyki, i zaraz jaje rejtynh na kinasajtach zusim nievialiki, pa słovach Kašpierava była vielmi aktualnaj.
«Padziei ŭ Pieru byli nadzvyčaj śviežymi — Hołan pačaŭ zdymać svoj film praz dva tydni, paśla ich, — raskazvaje akcior. — Nam vielmi dobra tady płacili. Za adzin zdymačny dzień tady płacili moj miesiačny zarobak u teatry. Źvierchu zdymačnaj hrupie dali zialonaje śviatło, my zdymali navat na Vaładarcy».
Dla amierykancaŭ biełaruskaja rečaisnaść, pa słovach spadara Kašpierava, była vielmi niazvykłaj, adnak pryjaznaj.
«Naprykład, prablema była ŭ biełaruskich prybiralniach, to bok dla amierykancaŭ zrabili asobnuju, kudy puskali jašče tolki mianie, uvieś čas jana stajała zamknionaj na kluč», — śmiajecca Kašpieraŭ.
Darečy, Andy, dzie mieścicca turma i japonskaja ambasada, zdymali taksama ŭ Biełarusi — kali dakładniej, heta Atolina, u roli ambasady źniaŭsia Instytut sielskaj haspadarki, a interjery zdymali ŭ paviljonach Biełaruśfilma.
«Darečy, u Minsku zdymali nie tolki Ńju-Jork i Limu, — uzhadvaje spadar Kašpieraŭ. — Taksama amierykancy zdymali tut film pra padkop u banku Bierlina. Adnak, u hetym vypadku, bierlinskija vulicy ŭsio ž taki zdymali ŭ Bierlinie, a voś sam bank i inšyja sceny ŭ paviljonach zdymali na „Biełaruśfilmie“.
Tut ža zdymaŭsia film „Maskoŭskaja suviaź“. Adnak z taho času amierykancy, kanca 90-ch badaj što ŭ Minsku i nie pracavali».