Alaksandr Łukašenka nie vyklučaje viartańnia da raniejšaha miechanizmu apłaty balničnych listoŭ. Ab hetym jon zajaviŭ siońnia ŭ čas sustrečy z pracoŭnym kalektyvam AAT «BiełAZ».
«My možam viarnucca da taho, što było, — skazaŭ jon. — Ale nie treba śpiašacca, davajcie pahladzim, što atrymajecca (z novaha miechanizmu). Kali heta budzie na škodu ludziam i sacyjalnaj palitycy, tady admienim».
Alaksandr Łukašenka prapanavaŭ razhledzieć varyjant akazańnia zachvarełamu rabotniku materyjalnaj padtrymki niepasredna tym pradpryjemstvam, na jakim jon pracuje. «A tam, na pradpryjemstvie, raźbiarucca, kaho padtrymać», — skazaŭ jon.
Nahadajem, što 11 lipienia było ŭviedziena ŭ dziejańnie novaje Pałažeńnie ab paradku zabieśpiačeńnia dapamohami pa časovaj niepracazdolnaści i pa ciažarnaści i rodach, zaćvierdžanaje pastanovaj Savieta Ministraŭ № 569 ad 28 červienia 2013 h.
Tak, z 11 lipienia za pieršyja 12 dzion dapamoha raźličvajecca ŭ pamiery 80% ad siaredniaha zarobku (raniej było — 6 dzion ŭ pamiery 80%, a nastupnyja — 100%).
Dapamoha pa dohladzie za chvorym členam siamji, jak i raniej, raźličvajecca ŭ pamiery 100%. Ale sam raźlik siaredniaha zarobku istotna źmianiŭsia. Raniej siaredni zarobak za dzień raźličvaŭsia za apošnija 2 miesiacy dzialeńniem dachodu za hety pieryjad na faktyčna adpracavanuju kolkaść dzion. Pry hetym užyvalisia pavyšajučyja kaeficyjenty, kali akład (taryf) u dadzieny pieryjad pavyšaŭsia.
Ciapier ža siaredni zarobak raźličvajecca zychodziačy z zarobku za šeść miesiacaŭ biez usialakich kaeficyjentaŭ.
