Hałoŭnym upraŭleńniem pa baraćbie z arhanizavanaj złačynnaściu i karupcyjaj ( HUBOiK ) MUS vyjaŭlena hrupa sutenioraŭ, jakaja dziejničała ŭ Minsku amal 7 hadoŭ. U liku padazravanych čatyry čałavieki, siarod jakich try žančyny, u tym liku 46-hadovaja nastaŭnica matematyki UA «Himnazija №13 horada Minska».
Pa dadzienych baraćbitoŭ z arhanizavanaj złačynnaściu, padazravanyja z 2007 hoda, dziejničajučy ŭ składzie arhanizavanaj złačynnaj hrupy, trymali ułasny bardel, sa štatam prastytutak, jaki sami ž kamplektavali. Pryčym nastaŭnica matematyki staličnaj himnazii była najstarejšaj siarod usich členaŭ złačynnaj hrupy i samaj daśviedčanaj z «mamaniaŭ». Pry hetym žančyna jak piedahoh umieła znajści kluč da dušaŭ svaich vučanic i mahła realna ŭpłyvać na ich žyćciovy vybar.
Pavodle dadzienych HUBAZiK MUS usiaho ŭ štacie bardela było 15 «dziaŭčat pa vykliku», siarod jakich 13 byli biełaruskami, a jašče dźvie — hramadziankami Ukrainy.
Pra toje, ci trapili ŭ štat bardela vučanicy staličnaj himnazii №13 i ci prykłała da hetaha ruku ich nastaŭnica, infarmacyja nie razhałošvajecca, bo heta moža nanieści istotnuju škodu asabistym intaresam dziaŭčat. Ale viadoma, što nastaŭnica ščylna pracavała sa staršakłaśnicami na pazaškolnych mierapryjemstvach, u tym liku zabaŭlalnych, jakija ładziać minskija načnyja kłuby.
Usie kiraŭniki staličnaha bardela, u tym liku i nastaŭnica matematyki minskaj himnazii, zatrymanyja. U dačynieńni da ich raspačata kryminalnaja sprava pa prykmietach ździajśnieńnia złačynstva, praduhledžanaha č.2 art.171 Kryminalnaha kodeksa Biełarusi (vykarystańnie zaniatku prastytucyjaj abo stvareńnie ŭmoŭ dla zaniatkaŭ prastytucyjaj). Sankcyja hetaha artykuła praduhledžvaje pakarańnie da 10 hadoŭ pazbaŭleńnia voli z kanfiskacyjaj majomaści.
Materyjały kryminalnaj spravy pieradadzienyja ŭ centralny aparat Śledčaha kamiteta dla praviadzieńnia dalejšaha rasśledavańnia.
Varta adznačyć, što himnazija №13 ličycca adnoj z najlepšych u Minsku. Asabliva mocnaja jana ŭ matematycy.
Na sajcie himnazii zatrymanaja nastaŭnica matematyki ŭžo adsutničaje ŭ śpisie piedahohaŭ.
