U redakcyju «NN» źviarnuŭsia čytač Dźmitry, jaki byŭ aburany niemahčymaściu apłacić kamunalnyja pasłuhi ŭ paštovym adździaleńni.
«U mianie jość kartka VISA Classic rasijskaha «Śbierbanka». Ja chacieŭ zapłacić kamunalnyja pasłuhi ŭ paštovym adździaleńni №118 horada Minska, adnak kartku da apłaty nie pryniali.
Skazali, što ciapier absłuhoŭvajucca tolki kartki, emitavanyja tryma biełaruskimi bankami, i moj bank, zrazumieła, nie ŭvachodzić u ich lik. Heta poŭny absurd, bo VISA Classic — mižnarodnaja płaciežnaja sistema. Na sacyjalistyčnaj Kubie hetu kartku prymali paŭsiul, a na «Biełpošcie» — nie!» — paskardziŭsia jon.
Taksama Dźmitry dasłaŭ u redakcyju fota papiery, jakuju jamu vydali na pošcie. U joj tłumačycca, što «ŭ suviazi skančeńniem dahavornych adnosinaŭ z Pryjoram na absłuhoŭvańnie trymalnikaŭ kartak inšych bankaŭ» RUP «Biełpošta» budzie absłuhoŭvać tolki kartki, emitavanyja «Biełahraprambankam», «Pryjorbankam» i «Biełarusbankam».
Kartki astatnich bankaŭ nie absłuhoŭvajucca. Da taho ž kartki «Biełarusbanka» nie absłuhoŭvajucca ŭ płaciežna-daviedčych terminałach «Biełpošty».
U finansavym adździele pradpryjemstva paćvierdzili, što «z 11 kastryčnika 2013 hoda ŭ sietcy RUP «Biełpošta» apłata pasłuh vyrablajecca tolki bankaŭskimi apłatnymi kartkami nacyjanalnaj płaciežnaj sistemy BiełKart, mižnarodnych płaciežnych sistem VISA International i MasterCard (Maestro) AAT «Biełhazprambank», AAT «Pryjorbank» i AAT «ASB Biełarusbank»».
«NN» spytała ŭ namieśnika hienieralnaha dyrektara RUP «Biełpošta» Aleny Skrypčyk, ci chutka trymalniki kartak astatnich bankaŭ zmohuć apłacić pasłuhi pošty bieznajaŭnym raźlikam.
«NN»: Čamu ciapier vyklučna trymalniki kartak tolki troch bankaŭ mohuć karystacca bieznajaŭnym raźlikam?
Alena Skrypčyk: Na siońniašni dzień u paštovych adździaleńniach prymajucca tolki kartki sistemy «BiełKart» i kartki «Biełhazprambanka», «Pryjorbanka» i «Biełarusbanka». Taksama klijenty mohuć apłacić paštovyja pasłuhi hatoŭkaj.
«NN»: Što adbyłosia 11 kastryčnika? «Biełpošta» praterminavała damovu na absłuhoŭvańnie kartak inšych bankaŭ ci praź niejkija pryčyny nie padaŭžała jaje?
AS: Ja nie mahu kazać pra toje, što było raniej. Ja kažu pra situacyju siońnia. Jak ja ŭžo patłumačyła: vy možacie apłacić pasłuhi kartkami vyšejzhadanych bankaŭ ci najaŭnymi.
«NN»: Ci pracuje «Biełpošta» nad vypraŭleńniem situacyi i palapšeńniem zručnaści apłaty i siervisu? Kab trymalniki kartak usich bankaŭ mahli karystacca bieznajaŭnym raźlikam.
AS: Klijentam «Biełpošty» zručna apłačvać pasłuhi najaŭnymi. Kali niešta źmienicca, my paviedavim svaim klijentam. Uvohule RUP «Biełpošta» pastajanna pracuje nad palapšeńniem jakaści svaich pasłuh.
Varta adznačyć, što źmieny ŭ paradku bieznajaŭnaha raźliku, jakija nabyli siłu 11 kastryčnika, «Biełpošta» šyroka nie anansavała. Prynamsi na sajcie kampanii pra heta nie havorycca. Tamu, uładalnikam kartak inšych bankaŭ pryjdziecca spačatku źniać najaŭnyja ŭ bankamacie ci bankaŭskim adździaleńni i tolki paśla hetaha iści na poštu.
