Pakupnickaja zdolnaść biełaruskaha ekspartu ŭ studzieni—žniŭni 2013 hoda ŭ paraŭnańni z takim ža letašnim pieryjadam pamienšyłasia na 22,2%, paviedamili ŭ Nacyjanalnym statystyčnym kamitecie.
Jak rastłumačyli ŭ Biełstacie, heta adbyłosia «ŭ vyniku niespryjalnych vałavych umoŭ źniešniaha handlu, jakija charaktaryzujucca adstavańniem indeksu fizičnaha abjomu ekspartu tavaraŭ ad anałahičnaha pakazčyku pa imparcie». Pamianšeńnie vartasnych abjomaŭ ekspartu i impartu tavaraŭ u studzieni—žniŭni 2013 hoda «abumoŭlena padzieńniem siarednich cen i fizičnych abjomaŭ pastavak».
U paraŭnańni sa studzieniem—žniŭniem 2012 hoda tavarnaja masa ekspartu pamienšyłasia na 21,6%, impartu — na 8,7%. Siarednija ceny ekspartu pamienšylisia na 1%, impartu — na 0,3%.
Najbolš istotna skaracilisia fizičnyja abjomy ekspartu inviestycyjnych (na 18,3%) i pramiežkavych (na 28,4%) tavaraŭ, u tym liku enierhietyčnych (na 21,7%) i inšych pramiežkavych (na 34,5%) tavaraŭ. Źnižeńnie siarednich cen ekspartu nazirałasia pa hrupie pramiežkavych tavaraŭ (na 3%), što vyklikana padzieńniem cen na enierhanośbity (na 7,2%).
Pa imparcie najbolš nizkaje značeńnie indeksaŭ siarednich cen i fizičnaha abjomu skłałasia pa hrupie enierhietyčnych tavaraŭ (98,5% i 64,6%).
U studzieni—žniŭni 2013 hoda ŭ paraŭnańni sa studzieniem—žniŭniem 2012 hoda značna skaraciŭsia fizičny abjom ekspartu siadzielnych ciahačoŭ (u 1,9 razu), hruzavych aŭtamabilaŭ (na 35,3%), traktaroŭ (na 23,1%), naftapraduktaŭ (na 22%), sielskahaspadarčaj techniki (na 10,7%).
Razam z tym adbyłosia značnaje pavieličeńnie fizičnych abjomaŭ pastavak na ekspart zvadkavanaha hazu (na 29%), miasa i miasnych subpraduktaŭ (na 17%), tary płastmasavaj (na 15,1%), mebli, uklučajučy miedycynskuju (na 14%), małaka i małočnaj pradukcyi (na 12,5%).
Źnižeńnie siarednich cen ekspartu nazirałasia na zvadkavany haz (na 18,2%), kalijnyja ŭhnajeńni (na 13,9%), šyny (na 11,3%), naftapradukty (na 9,8%).
Pa imparcie značna skaracilisia pastaŭki ŭ naturalnym vyražeńni naftapraduktaŭ (abjom uvozu ŭ studzieni—žniŭni 2013 hoda skłaŭ tolki 1,2% da ŭzroŭniu studzienia—žniŭnia 2012 hoda), zbožžavych kultur (38,5%).
Źnižeńnie siarednich cen impartu nazirałasia na elektryčnyja ruchaviki i hienieratary (na 42,5%), vyličalnyja mašyny dla aŭtamatyčnaj apracoŭki infarmacyi (na 35,6%), aŭtamabili hruzavyja (na 25,7%), kaŭčuk sintetyčny (na 25,3%), cukar-syrec (na 17,1%), ruchaviki ŭnutranaha zharańnia (na 15,7%), čornyja mietały (na 13,4%).
