III Biełaruski pravaabarončy forum adbyvajecca 26-27 kastryčnika 2013 hoda ŭ Vilni. Da ŭdziełu ŭ Forumie zaprošany pradstaŭniki biełaruskich pravaabarončych arhanizacyjaŭ, mižnarodnyja i zamiežnyja pravaabarončyja struktury.
fota z fejsbuka Barysa Hareckaha
Padčas Forumu abmiarkoŭvajuć situacyju ŭ pravaabarončym ruchu, stan pravoŭ čałavieka ŭ Biełarusi i na postsavieckaj prastory, mahčymuju stratehiju dziejańniaŭ biełaruskich pravaabaroncaŭ.
Na adkryćci forumu siabra «Viasny» Taciana Raviaka adznačyła, što pravaabarončy ruch u Biełarusi «raźvivajecca i pašyrajecca». Pavodle jaje, dokazam hetaha — skład udzielnikaŭ: ciapierašni forum sabraŭ bolš za 110 delehataŭ z 25 arhanizacyjaŭ i inicyjatyvaŭ, jakija majuć dačynieńnie da pravaabarončaj dziejnaści, a ŭ 2010 hodzie było tolki 17 arhanizacyj.
Jak padkreśliła pravaabaronca, apošnija hady — čas sapraŭdnych vyprabavańniaŭ, i vyprabavańni dahetul nie skončylisia, pakolki lidar «Viasny» Aleś Bialacki ŭ źniavoleńni, a jaho termin — heta «acenka ŭładami jaho pravaabarončaj dziejnaści, vyklik ŭsioj pravaabarončaj supolnaści Biełarusi».
Pavodle Raviaki, kalehi pa «Viaśnie» paprasili Bialackaha dasłać pryvitalnyja słovy ŭdzielnikam forumu, adnak pravaabaronca nie staŭ hetaha rabić, bajučysia turemnaj cenzury. Zamiest hetaha jon pieradaŭ, što «ŭ dumkach zaŭsiody pobač», i paprasiŭ zarezervavać dla jaho pustoje kresła.
Siońnia płanujecca abmierkavać situacyju z pravami čałavieka ŭ Biełarusi z momantu praviadzieńnia raniejšaha forumu, pierśpiektyvy biełaruskaha pravaabarončaha ruchu i razhledzieć situacyju ŭ Biełarusi ŭ cełym u kantekście postsavieckaj prastory.
