Fota Illi Kuźniacova.
Fota Illi Kuźniacova.
Abstalavańnie i plušavaha miadźviedzika zabiraŭ pa davieranaści ad aŭstralijskaha telekanała SBS ich biełaruski kaleha Illa Kuźniacoŭ, jaki i paviedamiŭ pra heta pres-słužbie HA «BAŽ». Ciapier jon poštaj pieranakiruje hetyja rečy ŭ Aŭstraliju.
Pracoŭny stan abstalavańnia žurnalist nie praviaraŭ, bo ŭsie akumulatary za hety čas razradzilisia. Ci była vydalena niejkaja infarmacyja z nośbitaŭ i ci znajšli mytniki što-kolviek, što apraŭdvała b vyniatak, pakul nieviadoma.
Pavodle składzienaha mytnikami pieraliku rečaŭ, košt miadźviedzika jany acanili ŭsiaho ŭ 10 centaŭ. Miž tym, jak śviedčać zamiežnyja kalehi, na čornym rynku «braty-bliźniaty» šviedskaha miški kaštujuć pa niekalki socień dołaraŭ.
Vyhladaje na toje, što cacačnaha miadźviedzika dahladali vielmi pilna – ź niejkich mierkavańniaŭ u jaho źniali rukavički i addali ich asobna.
Amas Robierts – žurnalist aŭstralijskaha telekanała SBS, pracavaŭ tut u vieraśni 2012 h. na praciahu tydnia pavodle aficyjnaj akredytacyi pry biełaruskim MZS. U pryvatnaści, žurnalist zdymaŭ u Biełarusi siužet pra šviedski «plušavy desant».
21 vieraśnia Amas Robierts mieŭ pakinuć našu krainu, ale byŭ spynieny pry prachoždańni mytnaha kantrolu ŭ aeraporcie «Minsk-2». Pradstaŭniki mytnych słužbaŭ i nieviadomyja ŭ cyvilnym, jakija prysutničali pry hetym, zabrali ŭ jaho ŭsiu najaŭnuju aparaturu i nośbity infarmacyi – až da mabilnaha telefona. (Jak paviedamiŭ HA «BAŽ» sam žurnalist, pałova aparatury naležała jamu asabista, a pałova – telekanału SBS.)
Nazvać siabie hetyja ludzi admovilisia. Jon, u svaju čarhu, admoviŭsia padpisvać akt vyniatku aparatury, i jamu nie vydali na ruki nijakich dakumientaŭ, jakija b paćviardžali, što niešta zabrali. Paźniej, kali ŭ aeraport padjechali pierakładčyk i pradstaŭnik HA «BAŽ», sp. Robierts pajšoŭ padpisvać papiery, ale mytniki ŭžo admaŭlali, što zabirali aparaturu. Uvieś čas za žurnalistami sačyli nieviadomyja ludzi ŭ cyvilnym.
Na nastupny dzień žurnalista pa telefonie sprabavali zaprasić na razmovu ŭ KDB, ale jon admoviŭsia i skiravaŭsia ŭ aeraport. U časie pašpartnaha kantrolu da jaho padyšoŭ nieviadomy čałaviek u cyvilnym, jaki nazvaŭsia «pradstaŭnikom prezidenckaj administracyi» i paprasiŭ nie razdźmuvać skandału, paabiacaŭšy, što najbližejšym časam jaho rečy viernuć. Paśla hetaha Amas Robierts ŭsio ž sieŭ na samalot i pakinuŭ našu krainu.
Na prośbu kalehi biełaruskija žurnalisty nakiravali ŭ Hienprakuraturu skarhu, jakuju jon skłaŭ jašče ŭ Minsku. Kopii skarhi pajšli ministru ŭnutranych spraŭ, ministru zamiežnych spraŭ i staršyni Dziaržaŭnaha mytnaha kamitetu. Amas Robierts prasiŭ prakuroraŭ terminova pravieści pravierku pa fakcie niezakonnaha vyniatku ŭ jaho prafiesijnaha abstalavańnia, viarnuć zabranyja rečy i pryciahnuć vinavatych da adkaznaści.
Adkazy nie prajaśnili losu abstalavańnia.
U lutym hetaha hoda Amas Robierts atrymaŭ elektronny list z ambasady Aŭstralii ŭ Maskvie. Dypłamatyčnaje pradstaŭnictva pisała, što «biełaruskija ŭłady skončyli svaje mytnyja farmalnaści» z abstalavańniem sp-ra Robiertsa, i što ciapier jon sam albo jaho davieranaja asoba mohuć zabrać rečy ŭ aeraporcie «Minsk-2».
