Staršynia Brasłaŭskaha rajonnaha vykanaŭčaha kamiteta Uładzimir Łakamy pavinien być vyzvaleny ad zajmajemaj pasady za toje, što na Brasłaŭščynie vyśvietleny šmatlikija i złosnyja parušeńni pry vydzialeńni ziamielnych učastkaŭ la vadajomaŭ. Takoje rašeńnie pryniali padčas sumiesnaj kalehii Kamiteta dziaržaŭnaha kantrolu Viciebskaj vobłaści i prakuratury rehijona.
Ich i nie tolki, miakka kažučy, ździvili fakty "biaźmiežnych parušeńniaŭ" u Brasłaŭskim rajonie. Voś, naprykład, ustanoŭlena, što namieśnik staršyni rajvykankama pa ekanomicy Vanda Turonak u 2005—2006 hadach atrymała i aformiła ŭ pryvatnuju ŭłasnaść na siabie, hramadzianskaha muža i ziacia try ziamielnyja ŭčastki dla budaŭnictva i absłuhoŭvańnia žyłych damoŭ. Apošnija dva ŭčastki, vydzielenyja z parušeńniem zakanadaŭstva ŭ prybiarežnaj pałasie voziera Strusta, u dalejšym byli pradadzieny žycharam Minska pa canie za kožny (zhodna z damovaj kupli-prodažu) 1 miljon rubloŭ. Dalej cytata z aficyjnych vynikaŭ pravierki: "U toj ža čas zhodna z atrymanym u chodzie pravierki tłumačeńniem pakupnikoŭ za kožny ŭčastak było pieradadziena pa 10 młn rubloŭ. Ustanoŭlena, što Turonak V.A. ułasnaručna byli padpisany zajavy na vydzialeńnie ŭsich troch učastkaŭ i atrymany dakumienty paśla ich dziaržaŭnaj rehistracyi. U cełym vynikami pravierki paćviardžajecca, što Turonak V.A. u parušeńnie patrabavańniaŭ artykuła 22 Zakona Respubliki Biełaruś "Ab dziaržaŭnaj słužbie ŭ Respublicy Biełaruś" skarystała słužbovaje stanovišča pry ažyćciaŭleńni dziejańniaŭ pa nabyćciu ŭ pryvatnuju ŭłasnaść ziamielnych učastkaŭ"...
Staršynia Brasłaŭskaha rajvykankama, kali adkazvaŭ na pytańni ŭdzielnikaŭ pasiadžeńnia kalehii, tolki adznačaŭ, što ničoha nie viedaŭ pra dziejańni svajoj padnačalenaj. Nie zmoh jon kankretna rastłumačyć, čamu nie vykanany ŭ poŭnym abjomie try pradstaŭleńni, uniesienyja prakuraturaj rajona ŭ 2005—2007 hadach. Bolš za toje, z metaj lehalizacyi parušeńniaŭ rajvykankamam pravodziłasia karekciroŭka prybiarežnaj pałasy.
Nie ŭtulna adčuvaŭ siabie na pasiadžeńni i namieśnik staršyni Brasłaŭskaha rajvykankama Michaił Małatok. "Čamu Vy, jak staršynia kamisii pa vybaru ziamielnych učastkaŭ dla budaŭnictva, nie prytrymlivalisia zakonnaści, kali padpisvali akty ab vybary ŭčastkaŭ?" — cikavilisia ŭ jaho. Zrazumiełaha adkazu prysutnyja nie pačuli. Prakuratura Viciebskaj vobłaści budzie praviarać fakty parušeńniaŭ adkaznymi asobami zakanadaŭstva.
Namieśnik hienieralnaha prakurora Biełarusi Alaksandr Ivanoŭski, adkazvajučy na pytańni žurnalistaŭ, adznačyŭ, što vinavatyja čynoŭniki pavinny być pryciahnutyja da kryminalnaj adkaznaści: "Vyjaŭlenych faktaŭ dastatkova, kab pačać pravierku". Bolš za toje, jon dadaŭ: "Adkaznyja asoby, kali budaŭnictva damoŭ viałosia z parušeńniem zakanadaŭstva, buduć kampiensavać vydatki..."
U Miorskim rajonie pravierkaj byli vyjaŭleny 10 samavolna pabudavanych abjektaŭ, jakija treba było razburyć. Prakuror rajona aficyjna papiaredziŭ pra heta staršyniu rajvykankama. Ale ž zrabić usio nieabchodnaje ŭ poŭnym abjomie ŭ rajonie nie śpiašajucca. Na kalehii vyrašyli, što treba pryciahnuć da dyscyplinarnaj adkaznaści staršyniu rajvykankama. I kiraŭnika Połackaha rajvykankama taksama. Tut, u liku inšaha, vyśvietlili: na ziemlach dziaržaŭnaha lasnoha fondu samavolna aharadzili 1,6 hiektara lesu. Za aharodžaj staić 2-paviarchovy dom. Jość i altanka, navat pirs. Ustanoŭlena, što žyvie tut... 84-hadovaja babulka. Zaraz užo źniesiena aharodža, a voś dom zastaŭsia na svaim miescy. Padadziena zajava ŭ sud: maŭlaŭ, žyć babulcy niama dzie...
Usiaho pa vynikach pravierki na Viciebščynie vyjaŭleny 509 faktaŭ samavolnaha zaniaćcia ziamielnych učastkaŭ, u tym liku 173 — u prybiarežnych pałosach. Vyjaŭleny 533 niezakonna pabudavanyja abjekty.
