Hetuju infarmacyju paćvierdziŭ dyrektar sietki Andrej Zubkoŭ paśla akcyi ŭ padtrymku maładych biełaruskich tenisistaŭ.
«Šeść novych prajektaŭ uvachodziać u fazu budaŭnictva. 4 kramy znachodziacca ciapier na rekanstrukcyi», —
skazaŭ Zubkoŭ, kamientujučy płany kampanii pa raźvićci sietki ŭ Minsku. Usiaho ŭ Biełarusi ŭ sietcy «Jeŭraopt» naličvajecca 150 kramaŭ, ź ich 30 — u stalicy.
Samy bujny prajekt, jaki realizuje daččynaja struktura «Jeŭrahandlu» «Majak Inviest», — heta budaŭnictva handlova-zabaŭlalnaha centra z ubudavanym parkinham i dzieviacipaviarchovym administracyjna-bytavym kompleksam. Jon raźmieścicca ŭ miežach vulic Majakoŭskaha — Dzianisaŭskaja — Siamionava. Ahulnaja płošča — kala 53 tys. kv.m. Uvieś abjekt płanujecca zdać da kanca 2014 hoda. «Tam budzie hipiermarkiet «Jeŭraopt» płoščaj 6-6,5 tys. kv.m. Naša sietka bytavoj techniki. Astatniaje budziem zdavać u arendu», — skazaŭ Zubkoŭ.
Pavodle dadzienych inviestycyjnaha atłasa Minska, «Jeŭrahandal» płanuje pabudavać hipiermarkiet «Jeŭraopt» pa pr. Partyzanskim — MKAD płoščaj 10 tys. kv.m, a taksama handlova-zabaŭlalny centr u mikrarajonie Kamiennaja Horka (6 tys. kv.m). «Na hetych abjektach zakančvajecca praca pa prajektavańni. Moža być, da kanca hoda vyjdziem na placoŭki [i prystupim da budaŭnictva]. Kab uvieści taki centr, treba 10-12 miesiacaŭ», — skazaŭ Zubkoŭ.
Ab inšych płanach Andrej Zubkoŭ nie havoryć, tamu što nie viedaje, što «skaža novy zakon ab handli, jakuju dla nas dolu na rynku vyznačyć».
Niadaŭna «Jeŭrahandal» padpisaŭ miemarandum z Aščadnym bankam Rasii na adkryćcio kredytnaj linii da 150 młn dalaraŭ.
«Srodki buduć padavacca pa miery našaj patreby», - skazaŭ Zubkoŭ.
Varta nahadać, što ŭ minułym hodzie rasijski Alfa-bank daŭ sindykavany 5-hadovy kredyt «Jeŭrahandlu» na sumu 100 młn dalaraŭ. Pa słovach Andreja Zubkova, kredyt «užo zasvojeny».
