Urad narešcie vyznačyłasia z kančatkovaj redakcyjaj źmianieńniaŭ u Padatkovym kodeksie, jakija sprościać pracu adnym pradpryjemstvam i pavialičać nahruzku na inšyja. Parłamientaryjam tut adviedziena rola statystaŭ.
Namieśnik načalnika hałoŭnaha ŭpraŭleńnia mietadałohii padatkaabkładańnia arhanizacyj Ministerstva pa padatkach i zborach Biełarusi Ihar Skryńnikaŭ raskazaŭ, jakija źmieny buduć uniesienyja ŭ Padatkovy kodeks i, adpaviedna, jakija padatki daviadziecca płacić z 1 studzienia 2014 hoda.
PDV zastaniecca raniejšym
Na 2014 hod było zapłanavanaje pavyšeńnie hetaha padatku da 22%. Adnak zusim niadaŭna ŭłady ad hetaj idei admovilisia. Pamier staŭki PDV zastaniecca na ŭzroŭni 20 %. Kali, viadoma, urad da kanca hoda nie pieradumaje jašče raz.
Sproščanaja sistema padatkaabkładańnia
Dobraja navina dla advakataŭ i pryvatnych nataryusaŭ — z 2014 hoda jany zmohuć prymianiać sproščanuju sistemu padatkaabkładańnia (SSP).
Niekatoryja pradprymalniki, naadvarot, buduć pazbaŭlenyja takoj mahčymaści. Heta tyčycca asob, jakija zajmajucca tym, što padajuć majomasnyja pravy na tavarnyja znaki, licenzii, znaki absłuhoŭvańnia i h.d. Pavodle słovaŭ pradstaŭnika MPZ, vopyt pakazaŭ, što heta vysokadachodnaja śfiera biźniesu. Adnak mnohija takija pradpryjemstvy płacili nievialiki padatak pa SSP dziakujučy peŭnaj zakanadaŭčaj ščylinie. Jana dazvalała vyvodzić finansavyja srodki z adnaho pradpryjemstva ŭ inšaje: čaściakom atrymalnikami i licenzijatami vystupali IP, jakija rehistravalisia na «sproščanuju sistemu padatkaabkładańnia».
Taksama budzie admienienaja panižanaja staŭki ŭ pamiery 2 % pry ažyćciaŭleńni ekspartu. Vopyt taksama pakazaŭ jaje nieefiektyŭnaść. Dla subjekta haspadarańnia bolš vyhadna prymianiać SSP z PDV i viartać sumu pieravyšeńnia padatkovych vylikaŭ pa PDV, tłumačyć Ihar Skryńnikaŭ.
U ciapierašni čas subjekty, jakija prymianiajuć SSP, nie płaciać ziamielny padatak. Ale čaściakom vyjaŭlajucca fakty parušeńnia ziamielnaha zakanadaŭstva: zvyčajna heta samavolny zachop ziamli. Pry vyjaŭleńni takich faktaŭ subjekty ziamielny padatak płacić buduć.
Padatak na prybytak
Adbuducca peŭnyja pasłableńni ŭ vypłacie padatku na prybytak. Pa-pieršaje, źmienicca paradak prymianieńnia amartyzacyjnaj premii. Ciapier jana vielmi składana administrujecca, i jaje mała chto ŭžyvaje. Z 1 studzienia ŭviadziecca tak zvany inviestycyjny vylik. Heta značyć, što, vyličajučy vydatki na kapukładańni, subjekt haspadarańnia pieranosić na zatraty 10 % koštu adnačasova. A astatniaja suma pieranosicca na vydatki z dapamohaj naličeńnia amartyzacyi ŭ adpaviednasci z buchhałtarskim zakanadaŭstvam. Pryčym amartyzacyja budzie naličvacca na poŭny košt, u tym liku tyja 10%, jakija ŭžo pieraniesieny na zatraty.
Skaracić padatkovuju nahruzku pa prybytku dapamoža jašče adno novaŭviadzieńnie. U dačynieńni da dośledna-kanstruktarskich i navukova-daśledčych vydatkaŭ možna budzie prymianiać pavyšalny kaeficyjent u pamiery 1,5%. Heta dazvolić pradpryjemstvam pavialičyć svoj zatratny składnik u metach vyznačeńnia abkładalnaha padatkam prybytku.
Akramia taho, źmienicca spravazdačny pieryjad pa padatku na prybytak. Kali ciapier jon zajaŭleny jak kalandarny hod, to z 1 studzienia źmienicca na spravazdačny kvartał. Pa sutnaści, jak padatak vypłačvaŭsia štokvartalna, tak jon i budzie vypłačvacca . Važna, što heta daść mahčymaść pradpryjemstvam płacić padatak, zychodziačy z faktyčnaha prybytku, jaki jany ŭžo zarabili.
Padatak na nieruchomaść i ziamielny padatak
Z novaha hoda źjavicca mahčymaść pavialičvać staŭki i pa abjektach zvyšnarmatyŭnaha i niezavieršanaha budaŭnictva. A taksama miascovyja ŭłady zmohuć pavialičvać staŭki i kaeficyjenty za nieefiektyŭnaje vykarystańnie abo nievykarystańnie abjektaŭ nieruchomaści i ziamielnych učastkaŭ.
Adziny sielhaspadatak dla vytvorcaŭ
Ciapier panižanaja staŭka ŭ 1% budzie dziejničać dla tych subjektaŭ, u jakich bolš za 50 % vyručki atrymana ŭ chodzie realizacyi pradukcyi raślinavodstva i žyviołahadoŭli. Kali niama, to staŭka budzie 3 %.
Źjavicca novy padatak
Sa studzienia padatkovaja sistema papoŭnicca novym padatkam na ŭmienieny dachod. Praŭda, jon budzie prymianiacca tolki ŭ dačynieńni da mikraarhanizacyj, jakija akazvajuć pasłuhi pa techabsłuhoŭvańni i ramontu aŭtamabilaŭ. Bazaj budzie źjaŭlacca pastaŭleny dachod (siaredniaja vieličynia) plus roźnica pieravyšeńnia. Abkłaści małyja STA hetym padatkam ŭłady vyrašyli, kali pierakanalisia, što ŭzrovień padatkovych pastupleńniaŭ ad ich u razy mienšy, čym ad IP, jakija zajmajucca tym ža vidam dziejnaści.
