Siamion Šapira pryznačany staršyniom Minskaha abłvykankama. Pasada vyzvaliłasia paśla skandalnaj adstaŭki Barysa Batury.
«Naša Niva» sabrała piać faktaŭ pra novaha abłasnoha kiraŭnika.
Pierajemny doktar ekanamičnych navuk
Šapira — adzin ź niamnohich daktaroŭ navuk u biełaruskaj uładzie, pryčym takoje ž zvańnie mieŭ i jaho baćka, ekanamist-ahrarnik Barys Šapira.
Temaj daśledavańnia Siamiona stała «Kiravańnie ŭ ahrapramysłovym kompleksie pry farmiravańni rynkavych adnosin». Jak najbolš efiektyŭna pierajści ad płanavaj da rynkavaj ekanomiki? Jon prapanoŭvaŭ reformu ministerstva sielskaj haspadarki: skaracić kirujučy aparat na 50% i nakiravać ich u śfieru vytvorčaści.
Dziva što ŭ siaredzinie 1990-ch Siamion Šapira uvachodziŭ u kiraŭnictva Abjadnanaj hramadzianskaj partyi.
Stvaralnik ahrapramysłovych kompleksaŭ
Rolu novapryznačanaha hubiernatara Minščyny ŭ vybary stratehii ekanamičnaha raźvićcia krainy niemałaja. Mienavita jamu prypisvajuć ideju stvareńnia bujnych ahrapramsłovych kompleksaŭ va ŭsioj krainie.
A sam Šapira, prałabiravaŭšy ŭzbujnieńnie ahrakambinata «Dziaržynski», staŭ jaho dyrektaram. Nie atrymlivajučy vialikich dziaržaŭnych datacyj, jon demanstravaŭ dobryja vyniki pracy.
Ź Dziaržynska Šapira pierasieŭ u kresła ministra sielskaj haspadarki. Paśla jaho pieraviali ŭ Hrodna.
Nie apraŭdaŭ nadziei
Papiarednik Šapiry na pasadzie hrodzienskaha hubiernatara Uładzimir Saŭčanka pratrymaŭsia na hetym miescy amal dziesiać hadoŭ, zasłužyŭšy słavu źniščalnika histaryčnaj častki Hrodna. Pačuć pra Saŭčanku choć jakoje dobraje słova było składana — imidž samadura zamacavaŭsia za im tryvała.
Ad Šapiry čakali chacia b čałaviečaha staŭleńnia da ludziej. U pieršyja miesiacy pracy jon apraŭdvaŭ čakańni, ale… Usio stała na svaje miescy padčas ekanamičnaha kryzisu. Čaŭnaki, jakija pierakryli ŭ znak pratestu miažu, patrabavali sustrečy z hubiernataram. Ale dyjałohu nie atrymałasia. Razzłavaŭšysia, Šapira źjechaŭ, a zamiest jaho «na razmovu» z čaŭnakami pryjechaŭ AMAP.
Pieraličvaŭ niazhodnych u Hrodzienskim univiersitecie
U jašče bolš niepryjemnuju historyju Šapira trapiŭ sioleta padčas skandału z padručnikam «Hrodnaznaŭstva» i raspravy ź jahonymi aŭtarami. Zamiest taho, kab admaŭčacca, Šapira vyrašyŭ prademanstravać svaju «ščyraść». «Nakont Čarniakieviča prymaŭ zahad ja asabista», — raskryŭ tajamnicu zvalnieńnia historyka i dacenta HrDU Šapira.
«Napisali padručnik i nadrukavali za miažoju. Za čyje hrošy? — aburaŭsia jon padčas prezientacyi novaha rektara ŭniviersiteta. — Nie, kab da mianie pryjści i pahavaryć!».
Kančatkova šakavaŭ prysutnych Šapira, zajaviŭšy, što rehularna čytaje zvodki KDB: «Va ŭniviersitecie šasnaccać čałaviek, jakija zaklikajuć źvierhnuć uładu». Pieraličvać imiony niaŭhodnych jon nie staŭ.
Časovy biełarusizatar
Šapira zapomniŭsia i sprobaj miakkaj biełarusizacyi hrodzienskich čynoŭnikaŭ. U kancy 2010, padčas hramadska-palityčnaj libieralizacyi ŭ krainie, Hrodzienski abłvykankam pierajšoŭ na biełaruskuju movu.
Heta byŭ nie zahad, a «pažadańnie» hubiernatara. U vyniku narady pačali pravodzicca pa-biełarusku, dy i dakumientacyja viałasia na nacyjanalnaj movie. Ekśpierymient pratrymaŭsia niadoŭha — kurs u krainie źmianiŭsia paśla razhromu Płoščy ŭ 2010-m. Źmianiłasia i mova ŭ Hrodzienskim abłvykankamie.
* * *
Ekśpierty «NN» pastavili Šapiru na 28-je miesca ŭ sioletnim rejtynhu «Top-100 samych upłyvovych biełarusaŭ». «Dalejšuju karjeru Šapiry praduhadać składana — jon moža i syści ŭ staršyni kałhasa, i tryumfalna viarnucca ŭ Minsk». Alaksandr Łukašenka abraŭ dla jaho druhi varyjant.
* * *
Bijahrafija
Naradziŭsia ŭ 1961 h. u vioscy Račeń na Lubanščynie. Zakončyŭ Biełaruski dziaržaŭny instytut narodnaj haspadarki. Pracavaŭ hałoŭnym ekanamistam i staršynioj kałhasaŭ u Dziaržynskim rajonie. U 1999—2004 — u struktury Ministerstva sielskaj haspadarki, u 2004—2008 — hienieralny dyrektar «Ahrakambinata Dziaržynski». U 2008—2010 — ministr sielskaj haspadarki. U 2010-2013 — staršynia Hrodzienskaha abłvykankama, z 2013 – staršynia Minskaha abłvykankama.
