U niadzielu 3 listapada skłałasia paradaksalnaja situacyja, kali bolšaść žycharoŭ krainy nie zmahli pabačyć u žyvym efiry centralny matč 29 tura futbolnaha pieršynstva pamiž BATE i «Šachcioram». U vypadku pieramohi barysaŭcy mahli stać čempijonami krainy.
Hulnia skončyłasia ź likam 2:2. Pryčym, vyjhravali i adyhryvalisia abiedźvie kamandy. Tranślacyja ŭ žyvym efiry viałasia na telekanale «Biełaruś-5». Adnak dostup da jaho pakul što majuć tolki hledačy ź Minska.
Kali BATE — «Šachcior» jašče možna było zirnuć u internecie, to tranślacyju baskietbolnaha matča pamiž «Cmokami» i CSKA tolki na «Biełaruś-5».
My źviarnulisia da kiraŭnika Dyrekcyi telekanała «Biełaruś-5» Biełteleradyjokampanii Paŭła Bułackaha, kab jon patłumačyŭ niekatoryja momanty.
«Naša Niva»: Sport źnikaje z byłoha «Ładu»? Čamu nie było arhanizavana tranślacyi matčaŭ BATE — «Šachcior» i «Cmoki» — CSKA?
Pavieł Bułacki: Futboł pakazvali, ale ŭ zapisie. Tranślavać baskietboł paśla futboła ŭžo paličyli niematazhodnym. Tranślacyi z «Biełaruś-2» nikudy nie źniknuć, jany zastanucca, adnak čas budzie ssunuty. Na «Biełaruś-5» my zacikaŭlenyja ŭ bolšaj kolkaści pramych tranślacyj.
«NN»: Vaš namieśnik Vadzim Levada havaryŭ ab tym, što da 1 studzienia telekanał «Biełaruś-5» budzie dastupny absalutna ŭsim. Heta realna?
PB: Nie ŭsio zaležyć ad nas. Robim toje, što možam rabić. Na siońnia «Biełaruś-5» jość u pakietach takich kabielnych sietak, jak MTIS, «KosmasTB», Zala, «Aksijoma». Heta samyja bujnyja kampanii. Siońnia prapracoŭvajem pytańnie ab dostupie da abłasnych centrach.
«NN»: A ci jość niejkaja kankretnaja ličba, kolki siońnia ludziej moža prahladać telekanał?
PB: Bajusia pamylicca. Lepš za ŭsio źviarnucca da kabielnych apierataraŭ. Adnak nakolki pamiataju, navat u taho ž MTISa bolš za 400 tysiač abanientaŭ.
«NN»: Viadomyja spartyŭnyja žurnalisty Siarhiej Novikaŭ i Maksim Bierazinski krytykavali pracu «Biełaruś-5» za toje, što tranślacyi pačalisia, a z kabielnymi kampanijami nie damovilisia. Spraviadlivaja krytyka?
PB: Zaŭvažu, ab aficyjnym adkryćci my nidzie nie trubili . Tolki paviedamili pra toje , što z 21 kastryčnika kanał pačaŭ viaščać nie ŭ testavym, a ŭ efirnym režymie. Niekalki paźniej my mierkavali abviaścić datu aficyjnaha adkryćcia i zapuścić vialikuju rekłamnuju kampaniju.
Ale za nas heta zrabili ŚMI, Razdutyja vialiki skandał. Ciapier my vymušany ŭ terminovym paradku rabić toje, što pieršapačatkova ŭ nas było namiečana jak płanamiernaja praca
Zrešty, idzie rabočy praces. Pierad nami pastaŭlena zadača — adkryć kanał da 1 studzienia 2014. Dumaju, što ŭsiu rabotu pa padłučeńni my skončym ŭ pačatku śniežnia.
«NN»: Chutka pačynajecca bijatłonny siezon. Honki buduć tranślavacca tolki na «Biełaruś-5»?
PB: Nie, tranślacyi zastanucca i na «Biełaruś-2». Praŭda, ci budzie heta žyvy efir, ci nie, ja nie viedaju.
«NN»: Adnosna płanaŭ. Ci płanujecca tranślacyja honak «Formuły-1», matčaŭ NBA i NCHŁ?
PB: Usio heta ŭ stadyi apracoŭki. Što tyčycca «Formuły-1», to siezon pačynajecca tolki ŭviesnu. Adnosna NBA abmiarkoŭvajem hetaje pytańnie, idziem adzin adnamu na sastupki. Razumiecie, biudžet u nas davoli abmiežavany, tamu atrymać usie tranślacyi, jakija nam by chaciełasia, pakul mała realna.
«NN»: A što adnosna nacyjanalnaha futbolnaha čempijanatu. Kolki hulniaŭ možna budzie ŭbačyć pa televizary ŭ nastupny hod?
PB: Jašče nie skončyŭsia hety čempijanat. Nam treba budzie padpisać novaje pahadnieńnie ab tranślacyi matčaŭ. Asabista mnie chaciełasia b, kab ich było bolš za adzin. Adnak tranślavać usie hulni tura, jak u Rasii, my nie majem mahčymaści.
«NN»: Adnosna biełaruskaj movy. Jak jana budzie pradstaŭlena na «Biełaruś-5»?
PB: U toj čas, jak z vami razmaŭlajem, na telekanale pakazvajecca futbolny matč «Arsienał» — «Livierpul», jaki tranślujecca pabiełarusku. Na dadzieny momant biełaruskaj movaj karystajucca tolki Pavieł Baranaŭ i Dźmitryj Hierčykaŭ. Adnak kali źjaviacca inšyja ludzi, to ni ŭ čym abmiažoŭvać ich nie budziem.
***
Što pakazvajuć?
Futboł: Liha čempijonaŭ, Liha Jeŭropy, Čempijanat śvietu, Čempijanat Jeŭropy, Čempijanat Biełarusi, Čempijanat Anhlii, Kubak kanfiederacyi, hulni zbornaj Biełarusi.
Chakiej: KCHŁ, Čempijanat śvietu, Čempijanat Biełarusi, tavaryskija hulni zbornaj.
Baskietboł: Adzinaja liha VTB.
Bijatłon: Kubak śvietu, Čempijanat śvietu.
Lohkaja atletyka: Čempijanat śvietu.
Tenis: Turniry WTA, turniry Vialikaha Šlema.
Handboł: Liha čempijonaŭ, Čempijanat Biełarusi.
Alimpijskija hulni.
Chto kamientuje
Uładzimir Navicki — futboł, chakiej, bijatłon
Pavieł Baranaŭ — futboł, boks (na biełaruskaj movie)
Alaksandr Ćviačkoŭski — futboł, chakiej, handboł, valejboł
Siarhiej Novikaŭ — futboł, handboł
Siarhiej Mackievič — futboł, valejboł, tenis, lohkaja atletyka
Alaksandr Dźmitryjeŭ — futboł, chakiej
Alaksandr Kaziukievič — lohkaja atletyka, bijatłon, baskietboł, tenis
Ułada Sarokina — mastackaja i spartyŭnaja himnastyki, vodnyja vidy sportu
Mikałaj Chadasievič — futboł
Śviatłana Paramyhina — bijatłon
Dźmitryj Hierčykaŭ, Alaksiej Pyncikaŭ — baskietboł
Valeryja Filajeva — tenis.
***
Chadasievič: Liču nieabchodnym pierajści na biełaruskuju movu
Kamientatar Mikałaj Chadasievič ab dośviedzie tranślacyj sportu pa-biełarusku: «Heta ŭsprymałasia aŭdytoryjaj telekanała «Biełaruś-2 », dzie byli hetyja tranślacyi, nie toje što dobra, a vielmi dobra.
Jość druhi momant: ci hatovyja padchapić hetuju inicyjatyvu inšyja kamientatary. Dla hetaha patrabujecca šmat padrychtoŭki, času i ŭnutranaj arhanizacyi.
Za kaleh adkazvać nie budu, ale ŭ pierśpiektyvie, što tyčycca mianie, liču nieabchodnym pierajści na biełaruskuju movu. Vialikaja kancentracyja pracy hetamu paspryjaje».
