Ciažkaje darožna-transpartnaje zdareńnie adbyłosia kala 20.00 u sieradu 20 listapada na trasie M-3 niepadalok ad hornałyžnaha kompleksu «Łahojsk».
Kiroŭcu lehkavika «Sitraen Ksara» nie ŭdałosia vykanać biaśpiečny abhon na vuzkim učastku darohi, tamu adbyłosia łabavoje sutyknieńnie s furaj.
Zahinuli dva čałavieki.
Na miestie zdareńnia pracavali ekstrannyja słužby, supracoŭniki Śledčaha kamiteta.
U čaćvier stali viadomymi padrabiaznaści.
Kiroŭca pajšoŭ na abhon, ale nie raźličyŭ, i mašyna ŭrezałasia ŭ paŭpryčep sustrečnaj fury «Mersedes». I tut ža jašče adzin hruzavik, «Skanija», udaryŭ u lehkavik, jaki adkinuła.
— Pa słovach kiroŭcy hruzavika «Mersedes», kali jon pabačyŭ, što jamu nasustrač lacić lehkavik, jon maksimalna ŭziaŭ uprava, ale ž hruzavik vialiki, tamu «Sitraen» usio adno začapiŭ pryčep, — tłumačać u pres-słužbie UDAI.
23-hadovyja Hanna Saŭčuk i Maksim Viečar pabralisia šlubam u subotu, 16 listapada. Jany byli prychadžanami pratestanckich cerkvaŭ: jon — «Łaski Božaj» u Vaŭkavysku, jana — «Vyratavańnie» ŭ Baranavičach.
U Baranavickaj hramadzie i prajšło viasielle.
Maładyja kiravalisia ŭ Šumilinski rajon, kudy ich adpravili na raźmierkavańnie. Vieźli z saboj viasielnyja padarunki… Aŭtamabil maładyja kupili ŭ Minsku za dzień da avaryi.
Hanna pa raźmierkavańni pracavała buchhałtarkaj u Šumilinskim rajvykankamie (Viciebskaja vobłaść).
Žałobnaja słužba i raźvitańnie projduć u carkvie «Vyratavańnie» ŭ Baranavičach ŭ čaćvier, 21 listapada, a 19.00.
