 |
Za 70 % akcyjaŭ aŭstryjcy zapłacili 1,05 młrd eŭra. Upieršyniu va ŭłasnaści eŭrapiejskaj kampanii akazvajecca takoje vialikaje biełaruskaje pradpryjemstva. Papiaredni ŭłaśnik, syryjski biznesoviec Id Samavi sam adkupiŭ MŁS u biełaruskaha ŭradu ledźvie miesiac tamu, nieviadoma za kolki.
Aŭstryjskaja hazeta Die Presse paviedamlaje pra ŭhodu jak pra ździejśnieny fakt. Telekom Austria (TA) nabyła 70 % druhoha pa pamiery biełaruskaha aperatara mabilnaj suviazi za 1,05 młrd eŭra. Umova była padpisanaja ŭ sieradu rankam paśla praciahłych načnych pieramovaŭ.
Raniej “Vełkamam” vałodaŭ ułaśnik kiprskaj kampanii SB Telecom syryjski biznesoviec Id Samavi (Ead Samawi).
«Kupla MŁS — častka našaj stratehii, skiravanaj na rost va Ŭschodniaj Eŭropie, i dazvalaje nam uvajści na pryciahalny telekamunikacyjny rynak Biełarusi», — tak prakamentavaŭ fakt kupli hieneralny dyrektar Telekom Austria Group Barys Niemzič (Boris Nemsic).
Taksama kampanija aformiła apcyjon na kuplu ŭ čaćviortym kvartale 2010 hodu reštkavyja 30 % za 320 młn eŭra.
Id Samavi zastaniecca kiraŭnikom SB Telecom Limited, usie menedžery SB Telecom i MŁC (VELCOM) buduć pryznačanyja Telekom Austria Group, jakaja budzie mieć poŭny kantrol nad aperacyjami VELCOM. Telekom Austria Group nabyvaje VELCOM cieraz svaju daččynuju kampaniju Mobilkom Austria.
Jak paviedamlajecca, hiendyrektar Telekom Austria (TA) taksama pryśpiešyŭ atrymańnie "zialonaha śviatła" dla ŭhody ad naziralnaje rady kampanii. Viadoma, što kantrolny orhan zładziŭ pasiedžańnie "na chutkuju ruku" i ŭchvaliŭ bujny kantrakt jašče 27 vieraśnia, nie ahałošvajučy rašeńnia.
Hetyja paśpiešlivaść i sakretnaść vyklikajuć novyja padazreńni. Pa-pieršaje, prodaž MŁS kiprskaj kampanii SB Telecom adbyvaŭsia ŭ poŭnaj sakretnaści. Dahetul nieviadoma, kolki jana zapłaciła Biełarusi. Možna peŭna kazać, što nijakaha adkrytaha tenderu nie było. Jak nia raz publična z honaram zajaŭlałasia, pryvatyzacyja ŭ Biełarusi adbyvajecca na siońnia pa rašeńni adnaho čałavieka.
A tut Id Samavi adrazu... pierapradaŭ kampaniju. Daliboh nie sabie ŭ stratu.
Nijakich kamentaroŭ nie dajuć u hetaj spravie ŭ biełaruskaj prezydentury, Ministerstvie suviazi i ŭ samoj kampanii.
Maŭčańnie biełaruskich dziaržaŭnych orhanaŭ dazvalaje vykazać mierkavańnie, što biełaruskaja dziaržava, mahčyma, straciła na pryvatyzacyi “Vełkamu” sotni miljonaŭ eŭra.
Fota photo.bymedia.net
