Paśla tydniaŭ pieramovaŭ kiraŭnictva Bieraścia ŭ asobie namieśnika staršyni Hienadzia Barysiuka i kiraŭnički adździełu ideałahičnaj pracy Ały Starykievič zabaraniła praviadzieńnie kancerta prajekta «Tuzin.Niemaŭla».
Impreza płanavałasia na 15 śniežnia ŭ miascovym Domie kultury. Mierkavałasia pakazać kłasiku biełaruskaha niamoha kino – stužku «U ahni narodžanaja» režysiora Uładzimira Korša-Sablina ŭ žyvym supravadžeńni hurtu Re1ikt, jaki napisaŭ muzyku da hetaha filma.
Kancert prajšoŭ uzhadnieńnie z načalnikam upraŭleńnia kultury abłvykankama Siarhiejem Panasiukom , jaki vykazaŭ hatoŭnaść pradastavić placoŭku dla kancerta.
Adnak, na pačatku tydnia svaju rezkuju niazhodu vykazała ideałahičnaje ŭpraŭleńnie horada. Kiraŭnička adździeła Ała Starykievič zachvalavałasia nakont aŭtarskich pravoŭ na stužku. Arhanizatary kancerta paprasili pradstaŭnikoŭ Dziaržfilmafonda Rasiei (tam zachoŭvajecca aryhinał stužki) napisać list u Brest nakont taho, što jany prajekt padtrymlivajuć i pravy na film nie asprečvajuć. Tady ŭ spadaryni Starykievič paŭstali pytańni da ideałahičnaha składnika stužki.
Ideołahaŭ naściarožyła toje, što ŭ stužcy fihuruje persanaž Bułak-Bałachovič, a taksama čalcy Rady BNR.
U niefarmalnych razmovach jany pryznalisia, što zaścierahajucca palityki i tamu nie chočuć davać dazvoł na praviadzieńnie takoha mierapryjemstva.
Namieśnik staršyni haradskoha vykankama Hienadź Barysiuk čamuści pacikaviŭsia ŭ kiraŭnika prajekta «Tuzin.Niemaŭla» Siarhieja Budkina, ci buduć prysutničać siabry partyi BNF (?!).
Haradskoje čynaviestva trymała abaronu da apošniaha.
Nie dapamahło navat umiašalnictva Ministerstva kultury Biełarusi, pradstaŭnik jakoha Ŭładzimier Lisoŭski asabista telefanavaŭ u Brest.
Sprava ŭ tym, što prajekt «Tuzin.Niemaŭla» byŭ pradstaŭleny ŭ miežach apošniaha kinafestyvala «Listapad», jaki pravodziŭsia jakraz pry padtrymcy Ministerstva kultury.
Pa vyniku za dva dni da praviadzieńnie mierkavanaha kancertu, jaho arhanizataram było kančatkova admoŭlena.
«U mianie skłałasia ŭražańnie, što čynoŭniki, adkaznyja za kulturu ŭ Bieraści, ščyra i addana nienavidziać hetuju samuju biełaruskuju kulturu. Musić, heta toj vypadak «pierahibaŭ» na miescy, bo naš prajekt byŭ zaćvierdžany ŭ Ministerstvie kultury i pakazany na fiestyvali «Listapad». Mahčyma prosta hetyja ludzi, maju tut na ŭvazie najpierš kiraŭničku adździełu idealahičnaj pracy Ału Starykievič i namieśnika staršyni Bieraściejskaha harvykankamu Hienadzia Barysiuka, znachodziacca nie na svaim miescy, bo zamiest taho, kab spryjać realizacyi tvorčych inicyjatyvaŭ u horadzie, jany ŭsialak pieraškadžajuć hetamu», — zaznačyŭ kiraŭnik prajektu «Tuzin.Niemaŭla» Siarhiej Budkin.
Tuzin.fm
