 Jury Zisier |
Asnoŭnyja prablemy biełaruskaha internieta ŭ paraŭnańni ź minułym hodam zastalisia raniejšymi. Pra heta 4 kastryčnika na kanfierencyi «Dziełavy interniet», što prachodzić 4—5 kastryčnika ŭ Minskim rajonie, paviedamiŭ hienieralny dyrektar UP «Nadziejnyja prahramy», staršynia savieta dyrektaraŭ tut.by Juryj Zisier.
Pavodle jaho słoŭ, asnoŭnych prablem u bajnieta niekalki: «fantastyčnaja darahoŭla» pasłuh dostupu ŭ sietku; niepradumanaje licenzavańnie; adsutnaść u dziaržaŭnaha siektara i eksparcioraŭ patreby ŭ ajčynnaj interniet‑rekłamie; niedaskanałaść pravavoj bazy elektronnaha dakumientaabarota, adnym z vynikaŭ čaho źjaŭlajecca niemahčymaść jaho paŭnavartasnaha ŭkaranieńnia ŭ krainie. Pavodle słoŭ Ju.Zisiera, prablemaj taksama źjaŭlajecca adsutnaść interniet‑handlu ŭ zvykłym jaho razumieńni, bo niama poŭnaha cykła luboha handlu «zamova — apłata — dastaŭka», usio zvodzicca tolki da zamaŭleńnia tavaraŭ praź interniet. «U vyniku źjaŭlajecca jašče adna istotnaja prablema — kankurencyja z suśvietnymi resursami, pierš za ŭsio z rasijskimi paštovymi i pošukavymi servisami», — dadaŭ jon.
Pavodle słoŭ Ju.Zisiera, siarod stanoŭčych tendencyj raźvićcia bajnieta možna adznačyć źjaŭleńnie ŭ 2007 hodzie troch rehistrataraŭ damiennych imion u zonie by zamiest adnaho. Aprača taho, važnaj padziejaj u hetaj śfiery stała źjaŭleńnie ŭ Biełarusi ŭ lipieni hetaha hoda Asacyjacyi infarmacyjnych i kamunikacyjnych pradpryjemstvaŭ «Bielinfakam». Jana stvorana dla pradstaŭleńnia i adstojvańnia intaresaŭ rynka IKT u dziaržorhanach.
Jak paviedamiŭ kiraŭnik savieta dyrektaraŭ tut.by, kolkaść biełaruskich sajtaŭ u interniecie ŭ 2007 hodzie ŭzrasła na piać tysiač i dasiahnuła 25 tys. u paraŭnańni z pakazčykam 2006 hoda. Aprača hetaha, kolkaść partałaŭ dasiahnuła 234 (letaś — 82), interniet‑došak abjaŭ — 230 (201), studyj vieb‑dyzajnu — 549 (542), sajtaŭ drukavanych ŚMI — 260 (239). Sioleta značna ŭzrasła kolkaść interniet‑mahazinaŭ — z 1.870 letaś da 3.049 ciapier.
Kanfierencyja «Dziełavy interniet» — adna z najbujniejšych IT‑padziej Biełarusi. Sioleta jana sabrała prykładna 500 udzielnikaŭ. Arhanizatar kanfierencyi — partał tut.by. Hienieralnym partnioram forumu vystupaje nacyjanalny apieratar elektrasuviazi RUP «Biełtelekam».
