Administracyja rynku «Kosaŭski» papiaredziła redaktara «Haziety Słonimskaj» i lekara Ivana Šehu, što da 1 studzienia tyja pavinny vyzvalić pamiaškańni, jakija ciapier arandujuć.
Pryčyna — pažarnyja słužby zabaraniajuć dalejšuju ekspluatacyju paviercha, dzie arandavalisia pamiaškańni.
Pavodle redaktara «Haziety Słonimskaj» Viktara Vaładaščuka, im prapanavali vyzvalić pamiaškańni da 1 studzienia.
Vaładaščuk kaža, što terminova šukaje ŭ horadzie novaje pamiaškańnie, kab nie spyniać vychadu hazety.
U inšym miescy redakcyja maje jašče adno nievialikaje pamiaškańnie, ale tam usiu redakcyju, asabliva reklamnuju słužbu, raźmiaścić niemahčyma.
Ivan Šeha aranduje pamiaškańnie dla svajoj niedziaržaŭnaj infarmacyjna-kansultacyjnaj ustanovy «Šehamedkansult» usiaho niekalki miesiacaŭ.
U hetaj ustanovie Šeha štodzień davaŭ biaspłatnyja kansultacyi chvorym ludziam. Kožny dzień da jaho na pryjom naviedvalisia pa 5–10 žycharoŭ Słonimskaha i inšych rajonaŭ.
Jon kaža, što nie źbirajecca vysialacca: «Ja zaklučyŭ z administracyjaj rynku damovu pra arendu pamiaškańnia na try hady. Tamu vysialacca paśla niekalkich miesiacaŭ arendy nie źbirajusia.
Vysialacca ja budu tolki praz sud. A siońnia da mianie na pryjom pryjšło šmat chvorych ludziej, i ja praciahvaju ich kansultavać».