Nahadajem, što paśla skandalnaha pryjezdu na AAT «Barysaŭdreŭ» kiraŭnik Biełarusi Alaksandr Łukašenka inicyjavaŭ nie tolki sieryju hučnych adstavak, ale i maštabnuju pravierku tych pradpryjemstvaŭ drevaapracoŭki, dzie ŭžo hadami idzie madernizacyja i nie vidać nijakich vynikaŭ.
U adpaviednaści z rasparadžeńniem kiraŭnika dziaržavy, u listapadzie rabočaja hrupa, jakaja kuryruje vykanańnie prahram madernizacyi drevaapracoŭčaj haliny, adpraviłasia na AAT «Mastadreŭ». Pa vynikach inśpiekcyi byli zroblenyja niesuciašalnyja vysnovy.
Pavodle dadzienych Kamiteta dziaržaŭnaha kantrolu, madernizacyja na AAT «Mastadreŭ» praduhledžvaje mahčymaść vytvorčaści łaminavanych padłohavych pakryćciaŭ i draŭniana-vałaknistych plit, jakija pakul naohuł nie vyrablajucca ŭ krainie i całkam impartujucca. Popyt na hetyja tavary ŭ Biełarusi vielizarny, tamu prajekt abiacaŭ chutka akupicca pry ŭmovie praviadzieńnia madernizacyi ŭ termin i ŭ adpaviednaści z zaćvierdžanym inviestprajektam.
Zhodna ź pieršapačatkovym płanam, novaja vytvorčaść na AAT «Mastadreŭ» musiła być zapuščanaja jašče ŭ 2010 hodzie.
Adnak hety termin niekalki razoŭ pieranosiŭsia, i, pavodle apošnich dadzienych, pieršy łaminat u Mastach pavinien pačać vypuskacca ŭ kancy 2014 hoda.
KDK adznačyŭ niekalki pryčyn zaciahvańnia madernizacyi pradpryjemstva, na jakuju ŭžo vydatkavana kala 180 miljonaŭ jeŭra. U pieršuju čarhu heta praliki kiraŭnictva AAT «Mastadreŭ», nizkaja zarpłata rabotnikaŭ i vielizarnaja ciakučka kadraŭ. U druhuju čarhu prablemy z zaviaršeńniem madernizacyi źviazanyja ź niesumlennaściu padradčykaŭ, jakija pravodzili madernizacyju. Mienavita da adnoj takoj padradnaj arhanizacyi prakuratura Hrodzienskaj vobłaści vystaviła pretenzii, dakładniej, da kiraŭnika hetaj arhanizacyi.
U poli zroku prakuratury trapiła SAAT «Enierhatechpram», jakoje ŭvachodzić u strukturu dziaržaŭnaha DVA «Biełenierha». Hetaje pradpryjemstva aktyŭna ŭdzielničaje ŭ madernizacyi kacielniaŭ ustanovak. Pryčym nie tolki na bujnych CEC, ale i na maleńkich vytvorčaściach, u tym liku tych, jakija vykarystoŭvajuć alternatyŭnyja krynicy paliva, naprykład, spalvańnie bijamasy. Takaja kacielnia ustaloŭvajecca i na AAT «Mastadreŭ».
Kryminalnaja sprava ŭ dačynieńni da dyrektara SAAT «Enierhatechpram» była raspačataja prakuraturaj pa materyjałach Hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj MUS. Kiraŭniku pradpryjemstva inkryminujecca ździajśnieńnie złačynstva pa č.3 art.424 Kryminalnaha kodeksa Biełarusi (złoŭžyvańnie ŭładaj abo słužbovymi paŭnamoctvami, ździejśnienaje słužbovaj asobaj, jakaja zajmaje adkaznaje stanovišča, albo pry ažyćciaŭleńni funkcyjaŭ pa raździaržaŭleńni ci pryvatyzacyi dziaržaŭnaj majomaści, albo jakija paciahnuli ciažkija nastupstvy). Sankcyja hetaha artykuła praduhledžvaje pakarańnie da 10 hadoŭ pazbaŭleńnia voli.
Na dumku prakuratury, padazravany z sakavika pa červień 2012 hoda, złoŭžyvajučy słužbovymi paŭnamoctvami, pryčyniŭ škodu AAT «Mastadreŭ» na bolš čym 325 miljonaŭ rubloŭ.
U ciapierašni čas kryminalnaja sprava dla arhanizacyi papiaredniaha rasśledavańnia pieradadzienaja ŭ Śledčy kamitet.
Treba adznačyć, što heta nie pieršaja kryminalnaja sprava, raspačataja pa vynikach madernizacyi pradpryjemstvaŭ drevaapracoŭki. Raniej pa ŭkazie prezidenta kryminalnyja spravy byli zaviedzienyja taksama i pa madernizacyi AAT «Barysaŭdreŭ».
