U palitviaźnia Ŭładzia Jaromienki nieŭzabavie narodzicca dačka, paviedamiła asabistuju navinu žonka aktyvista, pieradaje radyjo «Svaboda».
Ciažarnaja žonka Ŭładzia Jaromienki Valancina zrabiła ultrahukavoje daśledavańnie i ciapier dakładna viedaje, što ŭ ich z Uładziem nieŭzabavie narodzicca dačka. Pavodle Valanciny, muž hetaj navinie, pra jakuju pakul nia viedaje, budzie vielmi rady. Ad Uładzia Jaromienki za amal dva tydni jahonaha znachodžańnia ŭ izalatary na Vaładarskaha pryjšło try listy. U apošnim liście jon paviedamiŭ, što bačyŭsia ŭ viaźnicy z aktyvistam Vasilom Parfiankovym.
«Napisaŭ, što bačyŭ Parfiankova, toj trymajecca. Uładź prosić napisać jamu list. Heta ŭsio, što jon napisaŭ pra Parfiankova».
Valancinu niepakoić toje, što advakat da jaho tak i nie dapuščany. Nibyta Jaromienak nie napisaŭ adpaviednuju zajavu, ale Valancina ŭ hetuju pryčynu nia vieryć, bo miarkuje, što jaje muž ź jahonym turemnym dośviedam dobra viedaje pra toje, što advakata treba vyklikać zajavaj. Pavodle Valanciny, Uładź napisaŭ u liście, što ŭmovy na Vaładarcy zastalisia tyja ž, što i try hady tamu, kali jon tudy trapiŭ paśla Płoščy.
Uładź Jaromienak budzie adbyvać try miesiacy ŭ aryštnym domie ŭ Baranavičach. Aktyvista «Maładoha frontu» pakarali za parušeńni praviłaŭ prafilaktyčnaha nahladu. Pavodle takoha ž złačynstva prysudzili hod kalonii i byłomu palitviaźniu Vasilu Parfiankovu. Na «Vaładarcy» Vasil Parfiankoŭ čakaje razhladu svajoj kasacyjnaj skarhi.
