Kiraŭnik daśledča-analityčnaha mižnarodnaha centru Legatum Institute Džefry Hiedmin kaža, što prymajučy rašeńni adnosna budučyni, luby kiraŭnik luboj kampanii ci ŭstanovy naohuł sutykajecca z dylemami, heta značyć, z sytuacyjami, u jakich davodzicca vybirać pamiž adnolkava niavyhadnymi rašeńniami.
U svaim błohu, źmieščanym na sajcie Harvard Business Review, Džefry Hiedmin pryhadvaje ŭ hetaj suviazi adnu asabistuju dylemu, u jakoj jon apynuŭsia, kali byŭ prezydentam Radyjo Svabodnaja Eŭropa/Radyjo Svaboda (2007-2011).
Akazvajecca, spadara Hiedmina tady prainfarmavali, što adzin z žurnalistaŭ na Radyjo niekali pracavaŭ tajnym ahientam u raźviedcy varožaj dla ZŠA dziaržavy. Fakt ahienturnaha supracoŭnictva žurnalista staŭ viadomy tolki niadaŭna, u novaj hieapalityčnaj sytuacyi, kali ad zhadanaj raźviedki i zhadanaha varožaha režymu nie zastałosia i śledu. A tym časam były raźviedčyk staŭ vielmi pavažanym žurnalistam i kaleham. «Što rabić z hetym čałaviekam? Zvolnić jaho? Na jakoj padstavie? I jakija nastupstvy heta mieła b dla kampanii?» – pytajecca Džefry Hiedmin u svaim błohu, tak i nie raskryvajučy tajamnicy, što jon zrabiŭ u adnosinach da hetaha žurnalista.
U ahulnaści, kali chočacie zrabić prazorliva i prymać kampetentnyja rašeńni, dyk vam, pavodle Džefry Hiedmina, varta pracavać u čatyroch nakirunkach:
1. Pavialičvać svaju zdolnaść da nazirańnia.
«Dla pačatku, budźcie realistami dy zaŭsiody źbirajcie jak maha paŭniejšuju infarmacyju, jakaja dazvoliła b vam zrabić ułasnyja vysnovy i vyznačyć tendencyi. Uvažlivaje vysłuchoŭvańnie inšych – stračanaje mastactva ŭ sučasnaj kultury samaŭpeŭnienaści i naviaźlivaha prapaviedvańnia – moža dapamahčy nam adroźnić syhnał ad šumu» – piša Hiedmin.
2. Nie bajacca stać (krychu) nieludzimym.
«U mianie niekali byŭ kaleha, vydatny znaŭca Kitaju, jaki paźbiahaŭ kanferencyj i prafesijnych schodaŭ. Jahonaja lohika była prostaja. Jon byŭ pierakanany, što takija va ŭsich adnosinach pryjemnyja tavaryskija sustrečy niepaźbiežna viaduć da ŭźniknieńnia statkavaha myśleńnia ŭ asiarodździ ekspertaŭ».
3. Vyvučać historyju.
«Rabicie heta nie tamu, što historyja paŭtarajecca, a tamu, što historyja časta ryfmujecca, jak kazaŭ Mark Tven. Ryfmy mohuć datyčać schiemaŭ hramadzkaha žyćcia, upłyvu technalohii, abo sposabaŭ, jak dziaržavy prystasoŭvajucca da sučasnaści».
4. Vučycca vyrašać nieadnaznačnyja sytuacyi.
«Bolšaść z nas, ci to ad pryrody, ci to ad vychavańnia, zaprahramavanaja na toje, kab bačyć śviet praz pryzmu čorna-biełych vybaraŭ. Na žal, časta my znachodzim u hetym śviecie šmat šeraha koleru. Jak, naprykład, u maim vypadku z byłym vyviednikam, svajo rašeńnie adnosna jakoha ja tut nie mahu vyjavić».
«Žyćcio redka praciakaje liniejna, i navat najlepšyja prahnozy časta razburajucca tym, što my nazyvajem «niepradbačanymi nieviadomymi». Ale niachaj heta nie spyniaje vas u vašym pamknieńni vyvučyć minułaje i sučasnaść, kab lepš padrychtavacca da niavyznačanaj budučyni» – zaklučaje były prezydent našaha radyjo.