U Śvietłahorsku ŭviečary 5 kastryčnika milicyja praviała vobysk u kvatery Telmana Maślukova, miascovaha aktyvista demakratyčnaha ruchu. Milicyjanty šukali ŭ knižnych šafach kanistry ź minieralnymi ŭhnajeńniami.
Jašče ŭ krasaviku ŭ saŭhasie “Baraviki” Śvietłahorskaha rajonu była nibyta sproba kradziažu minieralnych uhnajeńniaŭ, i pa hetaj spravie prachodziŭ adzin z členaŭ siamji T. Maślukova. Pa vynikach rasśledvańnia, jakoje milicyja praviała tady, ničoha skradziena nie było, i spravu spynili za adsutnaściu składu złačynstva. Adnak ciapier śledstva raptam adnavili iznoŭ. Kali vieryć pastanovie z sankcyjaj śvietłahorskaha prakurora, milicyjanty praz 5 miesiacaŭ musili šukać u kvatery “pradmiety, jakija majuć dačynieńnie da spravy”.
Učastkovy inśpiektar, staršy lejtenat milicyi Dzianis Ivanavič Katkaviec i śledčy, lejtenant milicyi Dźmitryj Uładzimiravič Kazak pačali pieratrus z knižnych šafaŭ. Tam milicyjanty znajšli padšyŭku miascovaj niezaležnaj haziety “Rehijanalnyja naviny”. Pra heta jany pačali kansultavacca z kimści pa mabiłkovym telefonie, adnak vyśvietliłasia, što ŭ padšyŭcy tolki pa 1 ekziemplaru kožnaha vypusku. Ničoha inšaha, što b mahło mieć “dačynieńnie da spravy”, vyjaŭlena nie było, i padčas vobysku ničoha nie vyniata. U 2005 h., napiaredadni prezidenckich vybaraŭ, milicyja pravodziła ŭ T. Maślukova ahlad kvatery z metaju “pošuku narkotykaŭ i zbroi”. Ciapierašni vobysk T. Maślukoŭ maje namier abskardzić.
Nahadajem, što 16 vieraśnia pravaachoŭnyja orhany ŭ Śvietłahorsku praviali ahlad kvatery Arsienija Jahorčanki, 17-hadovaha studenta Jeŭrapiejskaha humanitarnaha univiersiteta ŭ Vilni. Ahlad pravodziŭsia pa kryminalnaj spravie niezarehistravanaj arhanizacyi “Małady front”. 25 vieraśnia T. Maślukoŭ, jaki navučajecca ŭ mahistratury hetaha univiersiteta, byŭ dapytany ŭ miascovym adździaleńni Kamiteta dziaržaŭnaj biaśpieki pa toj ža spravie. 30 vieraśnia milicyja ŭ Śvietłahorsku praviała pieratrusy kvateraŭ u Śviatłany Michalčanki i Siarhieja Dajnieki, jakija vystupali za zachavańnie sacyjalnych ilhotaŭ dla invalidaŭ, piensijanieraŭ i moładzi.
