Hałoŭny mastak Biełaruskaha dziaržaŭnaha teatra lalek Valeryj Račkoŭski pamior 2 studzienia na 60-m hodzie žyćcia.
Pra heta paviedamiła kiraŭnik litaraturna-dramatyčnaj častki teatra Luboŭ Dziomkina.
«Kalektyŭ teatra hłyboka smutkuje ab zaŭčasnaj śmierci Valeryja Jaŭhienaviča i vykazvaje spačuvańnie rodnym, blizkim, siabram i kaleham, — adznačyła jana. — Dziakujučy prafiesijanalizmu i biaźmiernamu talentu Valeryja Jaŭhienaviča Biełaruski dziaržaŭny teatr lalek dasiahnuŭ vysokaha mastackaha ŭzroŭniu svajoj tvorčaści. Nas pakinuŭ čałaviek, jaki zrabiŭ biassprečny ŭniosak u raźvićcio teatralnaha mastactva, čałaviek ź vialikaj litary, apantany prafiesijanał svajoj spravy. Heta niezamiennaja strata, bo z žyćcia pajšła sapraŭdnaja asoba, śvietłaja pamiać pra jakuju zastaniecca naviečna».
Raźvitańnie z majstram projdzie 4 studzienia ŭ 9.00, panichida pačniecca ŭ 9.30 u žałobnaj zale pa adrasie: Dałhinaŭski Trakt, 160a.
Valeryj Račkoŭski naradziŭsia 21 krasavika 1954 hoda ŭ vioscy Hančaroŭka (Smalavicki rajon Minskaj vobłaści). U 1984—1987 hadach pracavaŭ mastakom-pastanoŭščykam, u 1990—1998 hadach — hałoŭnym mastakom Minskaha abłasnoha teatra «Batlejka» ŭ Maładziečnie. Zajmaŭ pasadu hałoŭnaha mastaka Biełaruskaha dziaržaŭnaha teatra lalek z 1998 hoda.
Jak mastak-pastanoŭščyk, Račkoŭski pastaviŭ bolš za 75 śpiektaklaŭ dla dziaciej i darosłych u Biełarusi, Bałharyi, Litvie, Polščy, Rasii i Sierbii. Adnym z apošnich stała «Ładździa Rospačy» pavodle adnajmiennaj apovieści Uładzimira Karatkieviča (premjera adbyłasia letaś). Darečy, hałoŭnuju rolu vykanaŭ syn mastaka Źmicier Račkoŭski.
Niadaŭna Valeryj Račkoŭski i hrodzienski režysior Aleh Žuhžda pastavili ŭ Razani śpiektakl «… i pakarańnie». Za jaho mastak byŭ vyłučany na prestyžnuju rasijskuju premiju «Załataja maska». Jaje vyniki buduć padviedzieny ŭ krasaviku 2014 hoda. Užo biez tvorcy.