Śledčym kamitetam zavieršana rasśledavańnie kryminalnaj spravy ŭ dačynieńni da byłoha pieršaha namieśnika staršyni Škłoŭskaha rajonnaha vykanaŭčaha kamiteta — načalnika ŭpraŭleńnia sielskaj haspadarki i charčavańnia, a taksama kiraŭnikoŭ kamiercyjnaha pradpryjemstva Mahilova.
Jak paviedamili BiełaPAN u SK, śledstvam vyjaŭlena, što čynoŭnik, dziejničajučy ŭzhodniena z pradstaŭnikami kampanii, akazvajučy im svajo zastupnictva, za chabar arhanizavaŭ zaklučeńnie kiraŭnikami šerahu sielhaspradpryjemstvaŭ Škłoŭskaha rajona kantraktaŭ na pastaŭku bujnoj rahataj žyvioły, vyhadavanaj na terytoryi Sierbii, z nazvanaj firmaj.
Pa patrabavańni słužbovaj asoby rajvykankama kantrakty byli padpisanyja na zahadzia niavyhadnych dla biełaruskich pradpryjemstvaŭ umovach: 100-pracentnaja pieradapłata biez praviadzieńnia adboru žyvioł i pastanoŭki ich na karancin. Paśla abaviazacielstvy pa dadzienych kantraktach vykananyja nie byli.
U metach vykanańnia kantraktaŭ na rachunak kamiercyjnaj firmy było pieraličana bolš za 17 miljardaŭ rubloŭ, atrymanych sielhasarhanizacyjami ŭ ramkach dziaržaŭnaha metavaha kredytavańnia. Častka hetaj sumy — 700 tysiač rasijskich rubloŭ — paśla ich atrymańnia najaŭnymi praz rasiejskuju kampaniju była pieradadziena ŭ jakaści chabaru pieršamu namieśniku staršyni Škłoŭskaha vykankama.
Dziejańni słužbovaj asoby vykankama ŭ kančatkovaj redakcyi abvinavačvańnia kvalifikavanyja śledstvam jak pieravyšeńnie ŭłady i słužbovych paŭnamoctvaŭ, zamach na atrymańnie chabara ŭ asabliva bujnym pamiery.
Dziejańni kiraŭnikoŭ kamiercyjnaj firmy Mahilova kvalifikavanyja jak dapamoha ŭ pieravyšeńni ŭłady i słužbovych paŭnamoctvaŭ i kradziež šlacham złoŭžyvańnia słužbovymi paŭnamoctvami ŭ asabliva bujnym pamiery.
Čaćviora abvinavačanych źmieščanyja pad vartu. Kryminalnaja sprava pieradadziena prakuroru dla nakiravańnia ŭ sud.
