Naš ziamlak Maksim Piatrajeŭ razam z baćkami pierajechaŭ u Vołahdu ŭ dziacinstvie, tym nie mienš, jon vyvučaŭ biełaruskuju movu pa knihach. Pamiž inšymi zaniatkami jon piša pieśni pa-biełarusku i navat płanuje zapisać albom.
«Naša Niva» parazmaŭlała sa spadarom Piatrajevym, kab daviedacca, jak rasiejskaja publika reahuje na biełaruskuju movu i jak vyjšła, što klip «Lapisaŭ» «Kapitał» upieršyniu prezientavali mienavita ŭ Vołahdzie.
«Naša Niva»: Vy naradzilisia ŭ Babrujsku, jak apynulisia ŭ Vołahdzie?
Maksim Piatrajeŭ: Vielmi prosta, moj baćka – vajskoviec, jaho adpravili ŭ Vołahdu, kudy my i pierajechali siamjoj. Z taho času ja amal biazvyłazna žyvu tut, što praŭda, pa zakančeńni univiersiteta ja na hod viartaŭsia ŭ Babrujsk.
«NN»: Jak pačali pisać pieśni pa-biełarusku?
MP: Kali ja navučaŭsia na druhim kursie, baćki padaryli mnie hitaru. Niedzie praz hod źjavilisia pieršyja pieśni, jany byli na rasiejskaj i na anhlijskaj movach. A paśla źjavilisia i pieśni pa-biełarusku.
U kožnaj movy jość svaja miełodyka, časam toje, što narmalna hučyć pa-anhlijsku, vyhladaje jak tupaja biessensoŭnaja papsiacina, kali toje samaje praśpiavać pa-rasiejsku.
Tak i ź biełaruskaj movaj. Toje, što nie hučyć pa-rusku, moža vydatna zapracavać. U rešcie rešt, hołas ja ŭsprymaju jak častku miełodyi pieśni. Kali radok u hałavie składvajecca na toj ci inšaj movie, jon papiarednie nie pytajecca, na jakoj budzie lepiej.
«NN»: A movu dzie vučyli?
MP: Ja asabliva nie vučyŭ. Maju peŭnuju schilnaść da movaŭ, biełaruskuju vučyŭ pa knihach, pa biełaruskaj muzycy. Padčas žyćcia ŭ Babrujsku «sčytvalisia» biełaruskamoŭnyja šyldy.
Pa samaadčuvańni ja biełarus, i kryŭdna što situacyja z movaj składanaja. Jak prykład, jość Ukraina, dzie šmat usiaho stvarajecca mienavita na rodnaj movie, i heta rečy pryhožyja i mocnyja, čamu b i nam nie rabić toje samaje?
«NN»: Za biełaruskaj muzykaj sočycie?
MP: Metanakiravana – nie. Maju padborku ulubionych pieśniaŭ, «Lapisaŭ» tych samych vielmi lublu.
«NN»: Ci źbirajeciesia zapisvać pieśni?
MP: Doŭhi čas ja pisaŭ pieśni ŭ stoł, zredku śpiavajučy ich siabram. Paznajomiŭsia ź miascovym rytm-n-bluzavym hurtom, pačalisia kancerty i repietycyi. Paśla byŭ pierapynak na paŭtara hady. Ciapier ja zrazumieŭ, što treba zakryvać hieštalty – sabraŭ novy skład, zaraz źbirajemsia zapisvacca.
Ja dumaŭ pra biełaruskamoŭnuju kružełku, da kanca hoda budzie adpracavanaja nievialikaja prahrama na movie,
tym bolš jość čałaviek, jaki padbuchtorvaje zapisać pa-biełarusku jak minimum sinhł.
«NN»: Jak vałahodskaja publika reahuje na biełaruskamoŭnyja pieśni?
MP: Absalutna narmalna. Rasiejskaja publika ŭvohule vielmi łajalna stavicca da pieśniaŭ na inšych movach.
U anhłamoŭnych krainach, kali ty śpiavaješ nie pa-anhlijsku, nichto ciabie asabliva słuchać nie budzie. U Rasii trochi pa-inšamu, śpiavaj choć na staranarviežskaj jakoj-niebudź…
«NN»: Ale ž muzyka daloka nie asnoŭny vaš zaniatak?
MP: Tak, ja śpiecyjalist pa raźvićciu supolnaści, taksama voś užo dziasiaty hod ładžu mižnarodny fiestyval «Mulcimatohraf». Heta fest multymiedyjnaj tvorčaści, klipaŭ, taksama ceły šerah majstar-kłasaŭ i lekcyj. Sioleta budzie dziasiaty, jubilejny. Darečy, niekalki hadoŭ zapar nam na konkurs dasyłali svaje videaklipy biełarusy, hurt Recha, jakija śpiavajuć pa-biełarusku, što było vielmi pryjemna. A
ŭ 2008 my byli pieršyja, chto pakazaŭ klip «Lapisaŭ» «Kapitał», jany taksama dasłali jaho na konkurs. Kali nie pamylajusia, heta byŭ pieršy pakaz u historyi klipa.
